Ğəzzədə daveon kam kardeyro Azərbaycan R. tələb

Azərbaycan R. xarıci vəzorətxonə Ğəzzədə daveon təcili kam kardey tələbış kardə.

Zinə Şənbə Fələstini muğaviməti ğıvvon "Ələğsa Tufan" nomo əməliyotədə bə işğol bıə ərazi əcumlə Telaviv iyən Aşdod məntəğəon de rəket vositə həmlə kardışone.

Bə işğol bıə sərzəminon, de muğaviməti ğıvvon rəketi həmləon həmzəman Həmasi canqəkəyon bə Ğəzzə tanqə ətrofədə bıə sionist rejimi qədə şəhron nıfuz kardışone və çand qılə sionist rejimi hərbiçi əsir kardışone və çand qılə məntəğə həm bəştə dast qətəşone.

Fələstini muğaviməti co qılə qrupon həm Həmasiku ıştə komilə himoyə elan kardışone və xəbə doşone ki de Həmasi canqəkəyon bə ico canq bəkan.

Həmçınin israili ğıvvonku çand həzo kıştə bıə kəson şikil həm muntəşir bıə və muxtəlifə videoonədə bə Ğəzzə tanqə sionist rejimi hərbiçion cəsədon vırə bə vırə kardey vindey bəbe.

Bə İrna raporti əsos, Azərbaycan R. xarıci koon vəzorətxonə Fələstini daveonədə bə ğeyri hərbion ələyh, vızmtion məhkum kardey bəpeşt, Ğəzzədə daveon təcili surət kam bey tələbış kardə.