İ.Əliyevi dindarə məhbusonədə hiç kəs əfv nıkardışe

Marti 16-ədə Prezident İlham Əliyevi de Nəvuzə idi əlağədar 423 nəfər əfv karde barədə sərəncom doşe. Həmonə odəmon siyahiədə siyasi məhbusonədə 5 nəfəri nom heste. Əmo ey dini məhbusonədə hiç kəsış əfv nıkarde. Vəhalinən İslamə Həmrayəti sorədə bımi vey ehtiyac hestbe.

Iştənən Az.R əhali umumi nisbətədə məhbuson miğdari qorə Avropa devləton arədə 3-minə vırə qətedə. Əqər bə nəzə bısənəmon ki, Respublika polis vey cinayəton bə ğeyd sedəni, bı məsələdə Az.R qaspuən  1-minə vırədə bənine. Həmonə məhbuson 28 % de nəşə ticarəti məşğul be səbəbiku məhkum bə.

Dini məhbusonədə 2 nəfər - Əliyev Nicat və Kişiyev Namiq 4 sor 6 manqinə cəzo muddət bə orəx rəse bəpeşt çe zindono beşən. Əvon 2012-minə sori de Masalu rayoni 7 nəfər dindaron bahəm dəstqir kardəşonbe. Əmandənə dindaron hələən zindonədən.

Əliyevi hokumət ıştə islamafobiya siyasəti isə dəvom kardedə. "Vətən uğrunda.az" sayt Şeyx Sərdar Hacıhəsənli Apellyasiya Məhkəmə həxədə xəbə dərc kardəşe. Məlum bedə ki, həmonə ruji Şirvan şəhərədə faktiki ğeyri-rəsmi fevğəladə vəziyyət elan kardəşonebən. Ətrof rayoni polis ğıvvonən bə şəhər cəlb bən və kuçonədə ğərəvul kəşedənbən. Bə əhali votedəbin ki, "Vəhabiyon bə şəhər hucum kardəşone". Devləti ım cur bə təşviş dəşe səbəb ım be ki, Şeyx Sərdari tərəfdaronədə təğribən 80 nəfər ım məhkəmədə iştirak karde ro bə şəhər omənbən. Bə qorə hokumət çəvon tarsiku bə jıqo fevğəladə tədbiron dast ğandəşe.

İlham Əliyevi hokumət Azərbaycani xalqi islamə intibahiku jıqo bə xof dəqınie səbəbe ki, Nəvuzə idi ərəvədə dini məhbusonədə nəinki hiç kəs əfv nıkardışe, əksinə bə dini fəalon repressiv əməlon həniən qıvonin kardışe.