Huğuğ mudafiə təşkilaton İ.Əliyevi əfv fərman sərt tənğid kardışone
Martə manqi 16- minə ruji Nəvuzə idi ərəfədə İlham Əliyevi 423 nəfər əfv kardışe. İm fərmani məzmun tosə ısət çe huğuğə mudafiə təşkilaton diğğət mərkəzədey və çəvon tərəfo bə sərt tənğidi məruz mandedə.
"Bəşəri huğuğon klub"i sərdar Rəsul Cəfərovi bə "Kavkazskiy uzel" sayti votəşe ki, çəmə tərtib kardə 119 nəfər siyasi məhbusonədə cəmi 4 nəfər əfv kardışone ki, çəvonən cəzo muddəti orəxe lap kam vaxt mandedə bıe. Avropa Bəşəri huğuğon dair Məhkəmə hələ 2014-minə sori Respublika Alternativ Hərəkati lider İlqar Məmmədovi beqıno bıe təsdiğ kardəşbe. Avropa İttifaği Naziron Komitəən Boku hokumət çand kərə dəvət kardəşe ki, Strasburğ məhkəmə ım ğərari bə vırə bırosno. Əmo İ. Əliyev hələən bə Avropa İctimaiyyəti ım tələbi quşələxə kardedə.
"Siyasi məhbuson monitorinq mərkəzi" sədr Elşən Həsənovi votəşe ki, ım əfv fərmani məzmun əksərən cinayətkar odəmon azad kardeədə ibarət bıe. Çunki əfv siyahiədə bıəkəson 3-ədə 2 ğism , yəni 258 nəfər qonə cinayətə əməlon kardə odəmonin. Çəvon arədə xeyli odəmbıkışton, odəm dızdiəkəson hestin. Əmo İlham Əliyevi dini məhbusonədə hiç kəs əfv nıkardışe.
Milli Şuran hokuməti ım əfv fərman çe humanizmiku xeyli diəro qıley hərəkət hisob kardəşe. Şura pevolo kardə bəyanatədə votə bedə ki, ponə sornə jıqo əfv sərəncamədə çand nəfər məşhurə siyasi və vicdan məhbusonədə azad kardışone. Respublika ictimaiyyət ımsornə sərəncamikuən jıqo humanizm çəş kardedəbe. Əmo cəmiyyəti ım umu bı səfə təsdiğ nıbe. Imsornə əfv sərəncom İ. Əliyev hokuməti bə azadfikrinə, demokratik əhvolinə odəmon munasibətədə çimi bəpeştən repressiya siyasəti bardə məramış numayiş karde.
