İlham Əliyev məmləkəti iğtisadi inkişafəsdə hiç qıley problem vindedəni

Prezident İlham Əliyevi avğusti 20-minə ruji de Qədəbəq şəhəri cəmiyyəti numayəndon vindemonədə votışe ki, "az bo Azərbaycani ayəndə hiç qıley problem vindedənim, məmləkətədə har istiğamətədə surətinə inkişaf şedə, sosial və iğtisadi məsəlon de muvəffəğiyyəti həll kardedəmon".

Əmo bə Respublika iğtisadi sosial imkişafi dair statistik rəğəmon çe prezidenti votəyon əksi nişon dodə. "Moody’s Investors Service" beynəlxalğə reytinqə aqentiyyət Az.R hokuməti kreditə reytinq saru eğandəşe. Əv Azərbaycani istehsalə ğodrəti şe-şe zəif be, nati ğıyməti erjon, istehsali bə kam, bank-maliyyə sistemi behrani dılədə, devləti ğarzi barzə səviyyədə be bımi səbəb nişon dodə.  Moody’s hisob kardedə ki, Respublikadə haliyyədə mevcud jıqo qonə iğtisadi vəziyyət hokuməti ıştə ğarzon onıqordınie riski xeyli ziyod kardedə.

"Azadlıq.info" ımi  Boku hokuməti bardə səhv iğtisadi siyasəti məntiği nəticə hisob kardedə. De ım reytinqi Azərbaycani rəsmiyon votə optimist və nikbin bəyanaton tam beəsos be i kərən bə subut rəsedə. İğtisadşunas - ekspert Vahid Məhərrəmli İlham Əliyevi məmləkəti ərzağə əmniyyəti təmin karde barədə votə optimist bəyanatən beəsas hisob kardəşe, votəşe ki, orəxnə 3 sorədə bə məmləkət ərzaği mədaxil 24% ziyod bıə. İ qılə ımsornə 6 manqədə qujdi idxal 250%, şıtə məhsulon idxal 70% ziyod bıə. Məmləkəti bə nuni, çay, şəkər, beməyə ruəni tələbat təmom bə idxali hisob təmin bedə. Respublika əhali de ərzaği təminat rujbəruj bə xətoməndə səviyyə, yəni təmomən çe idxaliku bə jidasti vəziyyət omedə rəsedə.