MM bə Cinayətə Məcəllə əvəzon bəkarde

Prezident Əliyevi bə məmləkəti Parlamenti təklif vığandəşe ki, Cinayətə Məcəllədə xeyli əvəzon bıko. İm təklifonədə məğsəd cəzo sistemi humanist kardeye. Əqər MM çey təklifon ğəbul bıko, jəqo ım Məcəllə 25 qılə maddə dəyqış bəkarden.

Jıqo əvəzonədə qıley azadiəti məhdud kardə cəzo nevi tətbiğ kardeye. Im, cinayəti ıştə kədə çe muhafizə orğanon nəzarəti jitono kəşe nəzərədə qətedə.  Co qıley əvəzədə təklif bedə ki, bə umrinə cəzo məhkum bıə məhbuson vaxtiku bə nav de şərti azad karde mumkun bıbo.

Hələ ım əvəzon parlamentədə muzakirə bino nıbə, Az.R məhkəmon, məqəvuji həmonə əvəzon tətbiğ bino kardəşone. Futbolçi, Azərbaycani milli komanda uzv Cavid Huseynov jurnalist Rasim Əliyevi kışte təşkil karde səbəbiku bə 4 sor muddəti məhkum kardəşonbe. Əmo əvşon vaxtiku əvvəl zindono azad karde, ey de Almaniya hənəkədə iştirakən kardışe. Hətto Almaniya Futbol Federasiya sədri bımi etiraz kardışe, votışe ki, çəməku jıqo holədə həmonə vərzeşkari tamam çe vərzeşiku tojnidən. Əmə çe Azərbaycani hokumətiku tələb kardımone ki, Huseynovi azad karde səbəbi izah bıko.

Bi rujonədə məhkəmə sabiğ futbolçi Maşallah Əhmədovşən azad karde. Əv ımsori yanvarə manqi 3-ədə de dələdızdiəti maddə bə 8 sor zindonə cəzo məhkum bıəbe. Apellyasiya məhkəmə ım cəzo bə 2 sor eğandışe, çəyoən əv ım cəzo muddəti 3 hissədə 1 hissə kəşe səbəbiku məhkəmə əvış azad karde. Məqəvuji, cinayətə  cəzo humanist kardə tədbiron i qılə bə dələdızdon, ğatilon, bə hərombəhon aid bəben. Bə dini və siyasi məhbuson aidiyyətış nibəbe.