İronədə Azərbaycan Respublika prezidenti huzur, ımruj Tehronədə İron, Rusiyə Azərbaycan Respublika 3 tərəfiyə iclosi 2 minə dıvrə muzakirəon.

İron, Rusiyə və Azərbaycan Respublika prezidenton miyono 2 minə 3 tərəfiyə iclos ımruj Tehronədə bərpo be.

Həminə iclosi barədə İroni xarıci vəzir Muhəmməd Cəvad Zərif elanış kardə ki 3 qılə muhimmə kişvəri prezidenton miyono iclose və muzakirəonku hədəf məntəğədə sulh və stabiləti dəvom doe ijən kişvəron miyono iğtisodiyə inkişof heste.

Zərif təkidış kardə: İron, Rusiyə Azərbaycan Respublika prezidenton ğərore Tehroni 3 tərəfiyə iclosədə siyasi, iğtisodi, mədəni, insoni və məntəğə iyən dınyo mıvzoon barədə de yande votımon bekən.

Bəhram Ğasımi, İroni xarıci vəzarətxanə sıxənəvot həm 2 tərəfi, məntəğə və beynəl xalğiyə mıvzoon təğib karde həmçınin çokə de terrorizm mubarizə bardebarədə həmkarion ziyod kardeyo ım dıvrə iclosi vey muhimmə mehvər hisobış kardə.

Imrujnə 3 tərəfiyə iclosi co qılə hədəf ki çəy i minə dıvrə dəvardə sor Bukoədə bərpo bıə be şimal cənub dəhliz proyekti çoknə komil karde ijən İroni ətomiyə təvafuği barde sohbəton ğeyd bıən.

Xəbə omə ki prezident Əliyev ım iclosədə iştirok karero bə Tehroni Mehr-Abad airport varid bıə ijən İroni iğtisod vəzir Ağaye Kərbasiyan bə çəy vəy beşe.

İroni prezident Ağaye Ruhani, rəsmi sorətdə həm İlham Əliyevi ğəbulış kardə.