Şəmxani: əqə Avropa təzyığ varde fikədə bıbu, İroni xarıci siyasətədə sənibəton diyə bəbe.

İroni milli əmniyyət ali şura sərkatib votışe: əqə təəhudon icraədə bə Avropa zəifəti, ətomiyə təvafuğiku Amerkə xarıc beyku Avropa sue-istifodə karde ya xot co mıvzoonədə bə İron təzyığ vardeyro çı Avropa bevəcə siyasəton barədə yəğin hasil bıbu, Tehron ıştə xarıciyə siyasəti vindemonədə tojədən diyə bəkay.

İroni milli əmniyyət ali şura sərkatib Əli Şəmxani əlovəş kardə: Donald Trump fik kardə be ki dıştə şərton de zu bə Avropa icbur karde veyni kişvəron hmçınin Amerkə millət de ım ğərol mışoiyət kardən çumçiku ətomiyə təvafuğiku xarıc bıə, qıləy holədə ki ne Avropa və co kişvəron de əv mışoiyət kardən və ne Amerkə milləti, boçi ki bə voteyon əsose 60 faiz çı Amerkə millətiku de Trumpi ım ğərol muxalifətışon kardən.

Şəmxani Amerkə benəticə cəhdon bo İroni zumandə sahəon məhdud kardeyro çı Vaşenqtoni zəifəti və ocizəti nışonə zınəş be və xarıci iyən daxıli muxtəlifə zəminəonədə çı İroni daxıli və bumiyə zumandəti sıbut bey ruşinə şoyd hisob kardə.

İroni milli əmniyyət ali şura sərkatib votışe: ətom enerji beynəl xalğiyə təşkilat ki nəzorəti həxış heste, çı İroni ətomiyə bərnoməon sulhin bey çand kərə təidış kardə əmmo Amerkə ki dınyoədə bənə yeqanə kişvər bə milləton zidd ətomiyə silohonku istifodə kardə çəy karnamədə səbt heste ijən siyonis vəhşi və hırdən əkıştə rejimi de ətomiyə bombaon təchizəkış kardə çı İroni ətomiyə bərnoməon barədə nəzər doe həxış ni.

Şəmxani bə əmniyyət şura 2231 ğətnomə çarçobədə İroni ətomiyə bərnamon rəsmi zıne işorə və təkidış kardə: bə ətomiyə beynəl xalğiyə təvafuği əsos İroni ətomiyə bərnoməon idoməş tərzi-hol təyin bıə və bastə bıə ətomiyə muzakirəon kəybə, hiç vağt ijən okardey nibəbe.

Əv həmçınin İrağ və Suriyədə İroni hərbi mışovirəti huzuri de terrurizm mubarizə barde niyyəti ım kişvəron ğanuniyə dıvləton tələbi sayədə zınəş be və əlovəş kardə: dınyo etırofış kardə ki İroni əsərinə naxş bois bıə ki İrağ, Suriyə, Livan və həlbətə Avropaədə DAEŞ-i zumandəti iyən hevujəti vəy qətə bıbu və ım mıvzo bois bıə ki Amerkə və çəy həmpeymanon ki Təkfiri terrorismi əsliyə mıdofiəvon iyən binoəkə bıən ısət məydonədə məğlub bıbun, çən çəvon əsəboniyəti illət dərk bəbe.