İroni nat vəzir: Opek çı Trumpi dəstor və əmri jiədə ni.

İroni nat vəzir zinə şəv Viyanaədə Opek təşkilati çı Trumpi əmri jiədə qıləy təşkilat zınəş nıbe və təsdiğış karde: bə kişvəron zidd bəpe natiku bənə qıləy əbzar və siloh istifodə nıbu.

Bə İrna reporti əsos Bijən Namdar Zənqənə əlovəş kardə: Trump de sanqsiyaon bo İron və Vensoela ki Opeki moəsisonin vey bohran və nati vıjorədə mışkilaton icodış karde.

Zənqənə ijən nati və vojori ğeyri siyasi idarə karde tələbış karde və votışe: əqə nat de vojori prinsipon əməl beko yəğin çı həmmə tərəfon mənafe cəhətdə bəbe.

İroni nat vəzir təsdiğış karde: Opekədə har ğərol fəğət de uzvon icma və sədo bəbe icra bıbu.

Opek təşkilati 7-nə beynəl xalğiyə icma ımruj maştə Viyanaədə bərpo bəbe ki İroni nat vəzir həm əyo iştirokış karde. Im iclosi şuar "nat, bo stabilə tale əloğəon" ğeyd bıə.

Opek təşkilati 174-nə umumiyə iclos həm ğərore bəzi uzvon tələbon bəpeştə i yoni 22 bərpo bıbu; Trump ım uzvonku tələbış kardə ki nati istisoli miğdori ziyod bekən.

Çımiku bə nav həm bəzi çı Opek təşkilati uzvon bənə Ərəbiston ışən bə sə və nat vojorədə nırəsə əvəzi ıştə istihsol miğdori əlovəro kardə bən.