Ruhani: ətomiyə muğavilədə İron həmişə bəştə əhd bəfoş karde.

İroni prezident votışe: İron hiç faxt ətomiyə sazişədə bə vədəon əməl nıkarde ğəsdış nıbe.

Bə İrna raporti əsos Həsən Ruhani zinə Şimali Xorasanədə ətomiyə muğaviləş dınyoədə çı İroni siyasi huğuği iyən əxloği səbarzəti zınəş be və əlovəş karde: əkə ım sazış bə İroni xəyr və faydon əsos nıbe Amerkə 14 manq bənav çəyku xaric nıəbey.

Həsən Ruhani təsdiğış karde: Amerkə 12 sor iddeoş karde ki İroni məxfiyanə ətom bombaon soxtədə iyən ğeyri ğanuni koon əncom dodə ki ətom enerji beynəl xalğ təşkilat qırd jıqo iddeo rədış karde.

Əv bə çandə meydononədə İroni ğudrət və zumandəti oşko bey işorəş karde və votışe: Səddam rejimi 8 sor bə İron həmlə karde zəmonədə İroni mudafiə iyən ətomiyə muzakirədə İroni siyasi və huğuği zu-ğıvvə bə dınyo sobot be.

İroni prezident dınyo zalimon vədə yeqanə roş muğavimət zınəş be və təkidış karde: İron bənə yeqanə kişvər əmniyyət şuraədə çəy ətomiyə həx rəsmi ğeyd bıə.