De Həzrət imom Muhəmməd Bağır(ə) şəhodəti sorəqardışi mınosibəti səbəsəloməti.

İslamiyə İron dınyo şiəyon 5 nə imom Həzrət İmom Muhəmməd Bağır(ə) şəhodəti sorəqardışədə ğəm və matəmədəy.

Imruj hicri ğəməri 1440 nə sori zihəccə manqi 7 bərobər de miladi 2019 minnə sori avqosti 9 dınyo şiəyon 5 nə İmom Həzrət İmom Muhəmməd Bağır(ə) şəhodəti sorəqardışe.

Şiəyon 5 nə imomi ləğəb Bağır ya Bağırol-Ulum yəmi elmon okardəkəse.

Həzrət İmom Muhəmməd Bağır(ə) 19 soro 10 manq ıştə əzizə dədə Həzrət İmom Zeynul-Abedin(ə) şəhodəti bəpeştə imoməti yolə vəzifəş əncom do.

İmom Muhəmməd Bağır(ə) ıştə imoməti dovranədə islamiyə mədəniyəti nəşr və təbliğ, şaqirdon təlim doe, səhabon iyən milləti rəhbərəti karde ,milləti miyonədə ıştə əzizə cəd Həzrət Muhəmməd(s) rəsm və adəton icra karde İyən ğasibə hukuməti bə səhihə rəhbəri xəti aqah kardeku 1 ləhzə həm ğəflətış nıkarde.

Dınyo şiəyon 5 nə imom oxoysə hicri ğəməri 114 minnə sori zihəccə manqi 7 nə ruji 57 sorətiədə Mədinə şəhrədə əməvi xəlifə de Heşam İbne əbdulməliki xəbisə plani zəhrin be və bə şəhodət rəsə.

İslamiyə ironi millət Həzrət İmom Muhəmməd Bağır(ə) şəhodəti sorəqardışədə məçiton, təkiyəon, Məşhəd şəhrədə şiəyon 8 nə İmom Həzrət İmom Rıza(ə)-i pokə hərəm iyən Ğom şəhrədə Həzrət Xanım Məsumə(s) pokə hərəmədə əzadarəti kardən.

İron İslam Respublika Telerədio dınyo şiəyon 5 nə İmom Həzrət İmom Muhəmməd Bağır(ə) şəhodəti sorəqardışi mınosibəti bə dınyo həmmə mıslmonon xususi bə şımə əzizə Tolışon səbəsəloməti dodə.