De Həzrəte imom Əliyən-Nəğı(ə)-i milad ruji sorəqardışi mınosibəti təbrik.
Imruj Hicri Ğəməri 1441-ə sori Zil-Hiccə manqi 15, Miladi 2020-ə sori Avqustə manqi 5 de Şiəyon 10-nə İmom, Həzrəte Hadi(ə)-i milad ruji sorəqardışi bərobəre.
Həzrəte İmom Əliyən-Nəğı(ə) Hicri Ğəməri 212-nə sori Mədinə şəhri ətrofədə bə dınyo omə və ıştə əzizə dədə, şiəyon 9-nə İmom, Həzrəte Cəvad(ə)-i şəhodəti bəpeştə mısılmonon rəhbəriyəti bəştə qiş ğəte.
Çı İmom Əliyən-Nəğı(ə)-i məşhurə ləğəbonku "Hadi" yəni hidoyət əkə ğeyd bıə.
İmom Hadi(Ə) ıştə bərəkətinə jimonədə həğiğiyə islami sima və obrəzi elan karde xoto veyə cəhdış karde, çumçiku bə əğidəvi, fiki iyən ictimaiyəti muxtəlif məsəlon barədə soval və şubhəon cəvob doe xoto anədə icloson bərpoş karde ki həmonə əsri alimon və zınə şəxson diğğət iyən çı Həzrəti təlimon hevujə dıyoku istifodə karde bois bıə.
İmom Əliyən-Nəğı(ə) çı insoni, əxloği və fəzilət xusyətonədə kəmoli həddədə be.
Ə Həzrət ıştə əsrədə vey çok, imonin, səbrəkə iyən mıhtərəmə odəmonku be və bə oşko iyən bəloğətinə sıxan həmçınin kərimə əxloğon sohibəti məşhur be.
İmom Hadi(ə) de odəmon mehribon və bə fəğıron iyən kosibon vey komək kardə kəs be.
Bə həminə mınosibəti xoto və de diğğət bə Korona Pandemiya şərayeti, İroni mısılmonə millət zinə şəviku bəzi şəhronədə bıə mığəddəsə vırəon, məçidon iyən Huseyniyyəonədə de sahiyyəvi prinsipon rioyət karde, məxsusə şoə mərasimon bəpo kardəşone ki ımruj həm dəvom kardedə.
İron İslam Respublika Tolışi Rədio tərəfo çı Xıdo Rəsul(s) pokə nəvəonku qıləyni, İmom Əliyən-Nəğı(ə) moəku bıə ruji sorəqardışi bə şımə muxatəbon, həmmə mısılmonon və dınyoədə ozodi tələb kardə kəson təbrik ərz kardedəmon.
Samiraədə Həzrət Hadi(ə)-i hərəmi ziyorət karde bəşmə ğısmət bıbu.
