İroni İslamiyə İnğilobi Yolə Rəhbər: bə Suriyə hərbi həmlə məntəğə kişvəronro zərəl-ziyon iyən terroristonro mənafe icodəkəy.

İroni İslamiyə İnğilobi Yolə Rəhbər bə Suriyə ərazi təmamiyəti oqətey təkidış karde iyən hamiyəşe: Suriyə şimolədə harcurnə hərbi həmlə be şək, Tırkiyə, Suriyə və məntəğə həmmə kişvəronro zərəl-ziyon ijən terroristonro mənafe bois bəbe.

Həzrət Ayətullah Xamenei ımruj 3şənbə ruj de Tırkiyə prezident iyən dəy bə ico bıə heyəti vindemoni cərəyonədə bə 2 qılə kişvəri miyono xususi ticarət sahədə bıə həmkarion inkişofi işorəş karde iyən sionist rejimi bənə islami kişvəron miyono ixtilof icodəkə amil zınəş be və əlovəş do: Amerkə iyən sionist rejim çı Fələstin milləti nığılə hərəkəton vədə bımandon.

Ə Həzrət çı islami umməti izzəti bə nəzəonədə bıə ixtilofonku dəvarde iyən təfrəğə eğandə siyosəton vədə huşin mandey vabəstə zınəşon be və hamiyəşe: məntəğədə bıə ixtilofon icodəkəyonku qıləyni sionist işğalçiyə rejime ki Amerkə himoyəon jintonədəy.

İroni İslamiyə İnğilobi Yolə Rəhbər Fələstin məsələş çı islami umməti i minnə məsələ bə hisob vardeşe iyən təkidışon be: əqəçı bəzi dıvləton bə sioniston tərəf meyl peydo kardəşone əmmo, milləton nığıl surəti de ln rejimi muxalifin.

Həzrət Ayətullah Xamenei təkidış be ki bə sionist rejim iyən Amerkə bəpe təkyə nıbu və votışe: ımruj nə sioniston və nə Amerkə və nə co kəson çı Fələstini nığılə hərəkəti vəy qəte əzınin iyən koon oxo bə Fələstini milləti mənafe aid bıbe.

İroni Yolə Rəhbər de terrorizm mubarizə bardey barədə çı Tırkiyə prezidenti tələbon cəvobədə votışone: İron de terrorizm mubarizə bardey sahədə hukmən de tırkiyə həmkarəti bəkarde.

Həzrət Ayətullah Xamenei çı Tırkiyə və çəy sərhəddonədə bıə əmniyəti bənə İronədə əmniyət bə hisobış varde və hamiyəşe: Tırkiyə həm Suriyədə bıə əmniyəti bənə ıştə əmniyət hisobko.

Yolə Rəhbər İron iyən Tırkiyə miyono bıə iğtisodi həmkarion miğdor və keyfiyəti çı mıvcudə zərfiyətonku vey kam zınəş be iyən təkidış be: 2 qılə kişvəri prezidenton miyono bıə muzakironədə ın məsələ həl bıbu.

İroni İslamiyə İnğilobi Yolə Rəhbər çı məntəğə həmmə koonədə İron və Tırkiyə miyono əloğəon inkişofi vey foydəin və lozim zınəş be iyən hamiyəşe: daxıli məsələon iyən xarıci mudaxiləonədə İron həmmişə çı Tirkiyə dıvlətiku mudafiyəş kardə.