De dınyo şiəyon 11 minnə İmom Həzrəte İmom Həsən Əskəri(ə)-i şəhodəti sorqardışi minosibəti təsliyət.
Imruj Hicri Ğəməri 1445 minnə sori Rəbiul-Əvvələ manqi 8 iyən Miladi 2023 minnə sori Sentiyabrə manqi 24 minnə ruje, təğvimədə ımruj imomət iyən viloyəti osmoni 11-minnə ostovə İmom Həsəne Əskəri(ə)-i şəhodəti sorqardış ğeyd bıə.
Hicri Ğəməri 260-minnə sori jığonə rujonədə Xıdo qiramiyə Rəsul(s) pokə nəvonku qıləyni İmom Həsəne Əskəri(ə) İraği şimolədə bıə Samira şəhrədə şəhid be.
Ə Həzrəti qiramiyə dədə şiəyon 10-minnə İmom Həzrəte İmom Hadi(ə) iyən inə qıləy pok, alim, fəzilətin və əbaxşə Xanım be.
İmom Həsəne Əskəri(ə) ıştə qiromiyə dədə şəhodəti bəpeştə mısılmonon dini rəhbəriyyəti bəştə ohdəş qəte ijən elm və zıne məktəbədə çəxtə fəzilətinə alimonış perosniyə ki har qıləy çəvonku muxtəlifə İslamiyə elmonədə veyə dini əsəron bə vıcud vardeşone ijən bo İslamiyə məarifi rəvuc doe dıştə tərbiyəviyə zəhməton vey təəsirinə ğədəmon peqətşone.
Şiəyon 11-minnə İmomi 29 sori mıddətədə bıə umri bə 3 baxş təğsim karde bəbe: i minə hissə 13 sor Mədinədə, 2-minnə baxş 10 sor Samiraədə bıə Həzrəti İmoməti bənav və oxonə hissə ki 6 sor Həzrəti İmoməti dovranədə xulasə bəbe.
Bə həminə matəmi xoto İroni bəzi məzhəbi vırəonədə Həzrəte İmom Zəman(əc) qiramiyə dədə, İmom Həsəne Əskəri(ə)-i şəhodəti sorqardışi mərasimon bərpo be.
İroni Rəşt şəhri Tolışi Rədio tərəfo ım matəmi bə İmom Zəman(əc) iyən şımə əzizə mısılmonə Tolışon səbəsəlomətəti ərz kardəmon.
