İnğilabi rəhbər buməlarzədə bə ziyan vindəkəson komək rosneyu məsul şəxsonış bə fəaliyyət karde dəvətış karde.

İslami inğilabi yolə rəhbəri ironi ğərb hissədə buməlarzə hadisə bəpeştə və xəylion bə rəhmət şe iyən yarəjə be bəpeştə qıləy mesajış do.

Buməlarzə de 7.3 rixter zinə şanqo ironi ğərbiyə baxşon iyən iraği mıxtəlif şəhronış lorzıni.ironi ğərbədə zinə şanqonə buməlarzə nəticədə desbə ısət 200 nəfərisə ve bə rəhmət şən və bə 2 həzonəfəri nez həm yarəjə bən.

İslami inğilabi yolə rəhbər həzrət ayətullah Xamenei ım mesajədə votışe: de təəssıfi və veyə norohəti məmləkəti ğərb hissədə buməlarzə xəbə ki bə əzizə həmvətənon qıləy cəmi bə rəhmət şe iyən yarəjə be  və veyə ziyan bois bə məsəme.

Həzrət ayətullah Xamenei əlavəş karde məsul şəxson vəzifə ıme ki həminə əvvəlnə saatonədə dıştə həmmə zəhmət və zu bə ziyan vindəkəson məxsusən xərob bə binaon jiyədə mandəkəson komək rosneyu hərəkət bıkən və təcili sorətdə həmmə imkanonku bəhrə bardeədə tələfati ve be vəy bıqəton.

İslami inğilabi yolə rəhbəri əlavəş karde silahlinə ğıvvon islami inğilabi sepahe pasdaran və bəsic de nəzm və surəti xərobion bə kəno jeyu iyən yarəjəon ovıştıneyu komək bıkən və devlətiyə təşkilaton çı hərbi və ğeyre hərbiyə mərkəzon ıştə həmmə ğıvvonku bə ziyanvindəkəson və çəvon ailəon komək rosneyu istifadə bıkən.

Həzrət Ayətullah Xamenei votışe:az dıli nığılə vırəku ım tel və mısibətinə hadisə bə ironi millət məxsusən bə Kermanşah ostani əzizə cəmaəti və məxsusən mısibət vində ailəon səbəsəloməti dodəm və ocizanə mutəalə xıdoku tələb kardəm ki ım əzobi ıştə rəhmət və fəzli cəlb kardeyu robinə ğəror bıdə və bə çəmə əzizə milləti səbr və muğaviməti əlavə bıkə.

İslami inğilabi yolə rəhbəri votışe: həmmə kəsonku ki karde bəznen curi mısibətvindəkəson norohəti iyən çəvon ziyanonku kam karde tələb kardəm bə ziyanvindəkəson imdod rosneyu təcili hərəkət bıkən.