İroni Yolə Rəhbər: DAEŞ-i əhotə bə oxo rəse bə Amerkə iyən bəy vabəstə bıə rejimon zərbə jəe mənodəy.

İroni Yolə Rəhbər təkidışon kardən: DAEŞ xəbisə nəsli əhotə oroxniye bə Amerkə ısətnə və navonə dıvləton ijən bəy vabəstə bıə rejimoni ki məntəğədə ım qrupi bə vıcud vardəşon bən iyən hejo tərəfdarəti və komək kardeşone ta çəy nəhsə əhotə Asiya ğərbədə hevuj bıbu iyən siyonist işğal əkə rejimi hıkmronəti məntəğədə bə inkişof bırəsi zərbə jəe mənodəy.

İroni Yolə Rəhbər Həzrəte Ayətullah Xamenei İroni Sepah Təşkilati Ğuds məxsusə ğıvvon zinə ruji məktobi cəvubədə votışone: deşte həmmə vıcudi bə Xıdovənd xaliğ təşəkur kardəm ki muxtəlifə səthədə bə şımə iyən bə şımə koy həmroon fido karane mıcohidəton bərkət ətoş kardə ta de tağuton dasti qıləy xəbisə kaştə bıə do rişə de şımə saleh iyən çokə bandon dasti Suriyə və İrağədə bırniyə iyən məhv bıbu.

Ə Həzrət əlovəşon kardən: ım fəğət bə DAEŞ siyoə dim iyən sitəm əkə qrupi zərbə varid karde nıbe, bəlkəm qıləy saxtə zərbə bə xəbisanə siyasətoni be ki məntəğədə daxıliyə canqi icod karde, mıstəğilə dıvləton zəif karde ijən siyonist rejimi vədə mığoviməti məhv karde pidəşon bən ki ım qimro bıə qrupi sərkərdəon tərəfo icra bey holədə be.

İroni Yolə Rəhbər təkid kardışone: şımə de ım sərətaniy iyən həlok əkə vəzi məhv karde nı ın ki bə məntəğə iyən islam dınyo bəlkəm həmmə milləton və bəşəriyət yolə xidmət kardərone.

Ə Həzrət ım Yolə səbarzəti de səmimanə orzon təbrik votışone ijən təsdiğ kardən ki çı deşmenon hilə iyən co bevəcə planonku ğafil məbən.

Həzrəte Ayətullah Xamenei əlovəşon kardən: əvoni ki de qonə sərmoyəon ım xəbisə plani binoşon kardə bıən orom nibəmanden ijən səy bəkan co sahədə iyən məntəğə co mıvzoonədə deşmənçiyə planoni bıkəşon.

İroni Yolə Rəhbər təkid kardən: ənqizəon oqəte, huşin mande, vahdət, xətərnakə mandə terroriston məhv karde, həmmə sahəonədə hozzoətəti ijən mədəniyə bəsirəti ziyod əkə koon bəbe çı yodo beməkəmon.

Həzrəte Ayətullah Xamenei ijən votışone: şımə iyən İrağ, Suriyə və co kişvəronku mıcohidə bevəon bə Xıdo aspardəm, bə şımə səlom voteydəm ijən şıməni dıvo kardəç.

Ğeyd kəmon ki İroni Sepah Təşkilati Ğuds məxsusə ğıvvon fərmondə Qeneral Mayor Ğasım Soleymani zinə bə İroni Yolə Rəhbər qıləy məktobi vığande cərəyonədə çı DAEŞ-i xəbisə nəsli əhotə və hıkmronəti bə oxo rəse elan kardışe və ım yolə səbarzətiş bə Həzrət Ayətullah Xamenei iyən islam dınyo milləton təbrik votışe.