"DAİŞ"-i məhv karde bə həmə bəşəriyyəti nişon doə xidməte"
Suriyadə de terrorə ğıvvon canq bə orəx rəsedə. Im devləti əraziədə DAİŞ nominə beynəlxalğə terrorə təşkilati orəxnə muğavimətə məntəğon bə Suriya devlətə ərteşi nəzarət ovaştedə.
De ım tarixi ğələbə munasibəti İron, Rusiya və Turkiyə prezidenton Soçi şəhərədə vindemon dəvunişone, ım 3 qılə devləti çimi bəpeştə Suriyadə, həmən reqionədə həmkarəti prespektiv və prioritet cəhəton barədə molağaton barışone. Im sammiti yekunon həxədə qıley bəyannamə bə dınyo cəmiyyəti nəzə rosnişone.
Çe beynəlxalğə terrorə ləşkəri səpe ım tarixi ğələbə bə dast vardeədə İroni xalği ğəhrəmanə şucaəti məxsusi vırə hestışe. İroni Sepah təşkilati "Ğuds" briğada ğıvvon fərmandar qeneral-mayor Ğasım Soleymani terrorə DAİŞ-i ğıvvon tarımar karde, bo islami aləmi jiqo qıley tarixiə ğələbə barədə bə İroni Yolə Rəhbər Həzrəte Ayətullah Xamenei ıştə məruzə vığandışe.
Ayətullah-ul-ozma Seyid Əli Xamenei de ım ğələbə munasibəti bə ım məruzə cəvobədə votışe ki, DAİŞ-i məğlubiyyət iqlə terrorə qrupon ne, həmən əvoni təşkil kardə, bəvon dastəq doə Amerika və çey reqionədə jidastiə rejimon məğlubiyyəte, bəvon qıley yolə zərbəy. Şımə de ım mardevardə xərçanqə pandomi məhv karde iqlə bə reqioni məmləkəton və islami dınyo ne, bə həmə bəşəriyyəti xidmət kardəyone. Yolə Rəhbəri həmən votəşe ki, deşmen ıştə hiyləqərə planonku onıbəmande. Bı səbəbən huşyar mande, vəhdəti həniən ğoym karde lozime, mədəniə bəsirəti ziyod kardə tədbironən bəpe çe yodo beməkəmon.
