Nəhcul-Bəlağə pand iyən hikməton
Nəhcul-Bəlağə pand iyən hikməton
Əmirəl-Muminin Həzrət İmom Əli(ə) Nəhcul-Bəlağə şərifə kitobi 126-ə hikmətədə bə şəş qılə əxloği rəziləton işorə kardedə ki,əksərən çe insoni qırd muşkilot iyən bədbəxçətiyon mənşə və sərçeşməy.
Həzrət İmom Əli(ə) çın hikməti sıftədə bə pəxıləti iyən bəçəy yavə təsiron məsələ işorə kardedə və hamyedə:”Əcibtul-bəxilə....çe pəxıliku təəccıb kardedəm ki,bə qıləy fəğrəti nav şeydə ki,çəyku vitə və qıləy sərvəti çe dasto doydə ki,əy tələb kardedə.dınyoədə bənə fəğıron jimon kardedən,əmmo axırətədə bəpe sərvətmandon qıləy hisob cəvob bıdo”.
Əmirəl-Muminin Həzrət İmom Əli(ə) bın hikmətədə çe pəxıləti barədə qıləy reçinə təbiriku oko doydə və hamyedə:pəxılə fərdon fəğət bə cokəson nisbətədə pəxıl nin,bəlkəm kali vaxton bəştə ıştən nisbətədə həm pəxılin.əvon deməkə ki,bə qıləy sərvəti malikin,əmmo boştə qıləy fəğıronə iyən saxtə jimon hozzı kardedən və həmməysə yavə ıme ki,əvon ğıyoməti ruji bəpe çe ərbob iyən sərvətinə fərdon səfədə bımandon iyən ıştə molon hisobi cəvobi bıdon.qıləy holədə ki,dınyoədə bənə fəğıron jiyedəbin.aya jıqo şəxson jimon heyrətamiz iyən odəmi bə çoçinə vodor kardedəni?.
Bəzi fərdon de ıştəni bə dast dənoey,deştə sərvəton məğrurəti kardedən iyən ıştə mıvəğğətiyə maddi imkonatonku ğafil bıə zəmonədə,bə təkəbbırəti noxəşəti mıbtəlo beydən.və holın ki,əvon ıştəkuşon hiççi ni.həmmə insonon sıftədə qıləy be erjə nutfə bıən ki,de zəmoni dəvardey bə qıləy bu doə ləşi təbdil beydən ki, mərdum bəvon nez beyku tarseydən iyən bəvonku omə yavə bu xoto,votedən:vey rə ımi dəfnəkən ta çe kə,kuçə iyən xiyoboni fəzo aludə və notəmiz nıbu.liza İmom Əli(ə) şoçinəti izhor kardedə və hamyedə:”Əcibtul ......qıləy təkəbbırinə fərd ki,zinə ruji nutfə be iyən maşkinə ruji yavə bu doə ləşiku (bə rosti)təəccıb kardedəm”.....
Təkəbbır ki,həmonə ıştə pekırney iyən yol qəteye,bın dınyoədə çe insoni ıştə vucudi məbdə iyən mənşəku ğafil mandeyku qıləy ruşinə nışonəy və ehyanə inson bəştə məbdə iyən mıntəho erəxo,ın yoləşəxəti çəy vucudiku xaric bəbe.odəmi dığğəti cəlbəkə çi ıme ki,İmom Əli(ə) həmınə bın kutoə kəlmədə çe kibr iyən təkəbbıri mıolicə və damoni roon nışon doydə.əv həm çımiku iborəte ki, havaxti məğrurəti holət şımə vucudədə bə əməl ome,boəy çı miyoniku bardero,bəştə dəvardə iyən ayəndə nəzəkənən.bə ğəbıstonon bışənən iyən ıştə vəoməy həxədə fik-famkənən...
