Nəhcul-Bəlağə pand iyən hikməton
Nəhcul-Bəlağə pand iyən hikməton
Əmirəl-Muminin Həzrət İmom Əli(ə) Nəhcul-Bəlağə şərifə kitobi 129-ə hikmətədə çe insoni nəzədə de dınyo hırdəti vositə Xıdovəndi yolə əzəməti zıney mıstəğim iyən sərostə rabitə bəyon kardedə və hamyedə:”izəmul xalıği...Ofəyəvoni əzəmət məxloği ıştı çəşədə hırd bəkarde”.
Qıləy şəxs bə pəyğombəri(s) xıdmət rəse və dəparseşe:”əmə çokonə çe Xıdovəndi əzəməti dərk kardey bızınəmon?.pəyğombəri(s) boəy qıləy misolış je və hamyeşe:”ehyanə qıləy anqıştə biyobonədə bəsə zəminsə eqıno,çın anqıştə de ın biyoboni bıə nisbət çanədəy?.şımə votey əzıniyon anqıştə de qıləy biyoboni nisbətış bıbu.əmmo votedəyon:xeyli hırde.ın qıləy roye boçəy xoto ki,çe hırdə çi de dıjdə çi bıə nisbəti jıqo təsəvvırkəmon”.
Pəyğombəre-Əkrəmi(s) bəy hamyeşe:”zəmini kurə deştə qırd əzəməti bəy əhotə kardə çi nisbətədə bənə qıləy həlğəy ki,biyobonədə eqıniyə.çe zəmini qırd funksiyə bəçəy ətrofədə bıə və əy əhotə kardə çiyon nisbətədə,bənə qıləy həlğəy ki,biyobonədə eqıniyə.şımə ımoni həmmə de iminə osmoni nisbətədə mığoyisə kardə zəmonədə,iminə osmon anədə vey dıjde ki,ımon həmmə çəy mığobilədə bənə qıləy hırdə həlğəy.şımə qıləy vaxt ki,iminə osmoni bə dıminə osmoni nisbətədə mığoyisə bıkon,dıminə osmon anədə vey dıjde ki,iminə osmon çəy mığobilədə hırde.hejo jəqo bırəso bə ərş iyən həşi”.
İslomə din çe cohiliyyəti zəmonədə zuhurış pəydo karde,əmmo bəştə mərdumi zəmoni təkid kardedə ki, çe hestemoni aləmi əzəməti sırronədə təfəkkur iyən fik-famkənən.zəmini kurə ki,əmə bəvədə jimon kardedəmon,deştə qırd dıjdəti çe həşi mığobilədə anədə hırde ki,109 qılə bənə zəmini kurə çəy dılədə vırə bəqəte.co tərəfiku həşi mənzumə iyən sistem,çe dıjdə qalaktikə iqlə cuz və hissəy ki,həmonə qalaktikə nom həm şıtə roye.tıbğe astronom iyən fələki alimon,fəğət çəmə qalaktikədə bə i milyardi nezi astovə mevcude ki,çəmə həşi deştə qırd əzəməti çəy astovəonku qıləyni bə hisob omeydə.həmçinin bın dıjdə dınyoədə anədə qalaktikə mevcude ki,həni əvoni aşmardey iyən hisob kardey nomumkine və Xıdovənd çanədə yole ki,ın dıjdə loyihə iyən planış de jəqo dəğiğə nəzmi kəşəşe….
Əmirəl-Muminin Həzrət İmom Əli(ə) Nəhcul-Bəlağə şərifə kitobi 193-ə xutbədə ki,de Həmmami xutbə məşhure,çe təğvoninə şəxson vəsfədə jıqo hamyedə:”Əlxalığu əzəməl...Xalığ iyən ofəyəvon çəvon coni rufədə yol cilvəş kardə(bə həmonə dəlili xoto) ğərəz Xıdo çəvon nəzədə hırde.
De qıləy co iborəti əkəson ki,Xıdo əzəmətışon dərk kardə,qıləy zəmon ki,bə co məxloği nəzə kardeydən, çəvon nəzədə əv,bənə dıyo mığobilədə bıə qıləy ğətrə və ya çəyku bəkam cilvə pəydo kardedə.bə həmonə dəlili xoto,ehyanə bıpyimone əmə dınyoədə çe zehd iyən təğvo roy bıqətəmon və bə maddi mığamon iyən bə dınyo cəh-cəloli və sərvəti be etıno bıbəmon,bəpe əmə bəvədə bə Xıdovəndi nisbətədə bıə ıştə mərıfəti səth və səviyyə barzkəmon
