İmom Həsən Əskəri(ə)
İmom Həsən Əskəri(ə)
İmom Həsən Əskəri(ə) bə şiddətinə əmniyyəti vəzyəti dəlili xoto ki,bəy dıço bıəbe,hevujə şikilədə çe nomə nıvıştey metodiku və usuliku oko doydəbe.çə həzrəti duston iyən şiəyon həm de İmomi(ə) ın taktikə dərk kardey,ıştə sıvolon iyən məsələon nıvışteydəbin iyən ə həzrət həm bənə qıləy rəhbər iyən məsul şəxsi unvoni,həmmə ərsəonədə bəştə əshob iyən şiəyon koməq rosneydəbe. İmom Həsən Əskəri(ə) bəştə şiəyon bə xəy iyən çokə koon rəsey roon omuteyro,deçəvon məlum kardey koy məşğul beydəbe.min cumlə bə hidoyətədə bıə ağl iyən pandi erji jıqo işorə kardedəbin:”dılon de həvaye-həvəsəon pure.əmmo ağlon mane beydən və çe təcrubəon kuyətiyədə qıləy nuyə elm və zıney bə dast omeydə.pand iyən ibrət qətey,bə hidoyəti boyis beydə”.
İmom (ə) ıştə nomədə de bə Xıdovəndi inoyəton təkyə kardə holədə,dayima ıştə tərəfdoron bə Xıdovəndi təvəkkuli iyən umu mığobildə çe zılımkorə hakimon sıtəmi kam hisob kardey sıfarış kardedəbe.həmçinin ə həzrət bəştə tərəfdor iyən şiəyon təkid kardedəbe ki,”Xıdoku bıtarsənən iyən boəmə qıləy ziynət bıbənən,nəyinki,boəmə ar və yavəti.boəmə harcurnə dustiyəti cəlbkənən iyən yavəti çəməku bə diyərokənən.çun har qıləy çokəti ki,çəmə həxədə votey beydə,əmə bəy loyığimon iyən har qıləy bədə çiyon ki,çəmə barədə votey beydə,əmə jəqo nimon”.
Rəvoyətədə omə ki,İmom Həsən Əskəri(ə) deştə duston qıləyni dido və vindemonış bə təxır eğande.peşo bəy hamyeşe ki,ıştı barədə jıqom məsə ki,bətı loyığ ni və əv həm ıme ki,tı qıləy fərdı ıştə nəzdiku tojnıə.həmonə səhobə qıləy dəlilış varde ki,həmonə fərd bə qıləy dıjdə qıno mırtəkib bıəbe.həzrəti hamyeşe:rost votedəş,əmmo bəpe jıqo fərdon təhğır kardey və ya bəvon qıləy ihonət kardey nıbu.zira əvon bəmə mıntəsəbin(nisbət doey bıən) iyən ehyanə jıqo bıkoş tı çe ziyonkoronku bəbeyş.çoko ki,çe İmomi(ə) ım sıxanon bə həmonə fərdi quşon rəse,ıştə qınoku dastış kəşe və ıştə zəmonə pərhizkoronku be iyən çəy maqi bədiqə əvışon çe Həzrəte Məsumə(ə) məzori kəno dəfnışon karde.İmom Həsən Əskəri(ə) çe İlahi oxonə huccət iyən Və`də doə bıə Xiloskor Həzrəte Məhdi(əc) azizə dədəy ki,ısət ğeybəti pardə peştono jimon kardedə.çə həzrəti muhimmə vəzifəonku qıləyni çe Həzrəte Məhdi(əc) vilodəti bənav çə həzrəti imoməti zəminə hozzı kardey be.ə həzrət ziyodə şubhəon ıştən bərtərəf kardedəbe və bəvon cəvob doydəbe.
