Dılon mahbub
Dılon mahbub
Vəhdət çe Xıdovəndi dəstur iyən əmronkuye ki,Kərimə-Ğıronədə çandə kərə bəy işorə kardey bıə.Ali-İmrani mıborəkə surə 105-ə şərifə ayədə jıqo handedəmon:”Və la təkunu...bənə ə kəson məbənən ki,iyandeku co bin iyən çəvon miyono ixtilof eqıniye”.de ın ayə dığğət kardə holədə iftiroğ iyən coəti çe ixtilofi zəminə hozzı kardedə və de ın tərtibi mısılmınon dayimi şikilədə bəpe de iyande qıləy solim iyən bənə bıvə qıləy rabitəşon bıbu.dini muhimmə mərkəzonku qıləyni ki,bo təamul,bıvəti iyən vəhdəti vırəy,məçitonin.
İslomiyə qiromiyə pəyğombər(s) Mədinə şəhrədə İslomi hukuməti təşkili bəpeşt,məçiti soxteyış ıştə iminə dərəcədə bıə hərəkətonku ğərolış doe.İslomi sıftənə soronədə məçit nəyinki,çe ibodəti vırə be,bəlkəm çe mısılmınon bə ico cəm bıə vırə,beytul-mol iyən xəzinə məkon,çe canq iyən iztirori zəmonədə mərdumi pənoh bardə vırə,cəzo hukm sadir bıə məkon,ğanun noə bıə vırə iyən co bənə ımi bıə veyə çiyon məkon be və qırd ın vıron çe mısılmonə milləti həmdıləti iyən həmrayəti və vəhdətədə qıləy təsirinə rolış bıə.odəmi dığğəti cəlbəkə çi ıme ki,məçiti soxtə zəmonədə həm vəhdət iyən həmohənqəti və çe umumi mışorikəti cilvəş pəydo karde və qıləy ğəşənqə ləzə və anonış ofəyəşe.mısılmınon vohidə formədə çe məçiti bina soxtey iyən çəy vəsiləon hozzı kardeyədə iştirok kardedəbin və hətto pəyğombəre-əkrəm(s) həm bənə co mısılmınon çe ətrofiku sığ və co vəsiləon vardedəbin.bo məçiti ko kardə zəmondə pəyğombəre-əkrəm(s) şəxsən iyən həmmə mısılmınon qıləy şuori təkror kardedəbin ki,vəhdət iyən həmrayəti zumand kardedəbe. əvon jıqo votedəbin:”həyğiyə jimon həmonə axırəti jimone.Xıdolim ha! bə Ənsar iyən Mıhociron rəhm bıkə!”.....
İslomi torıxi hodisəon quya şoydin ki,pəyğombəre-əkrəmi(s) bo mısılmınon miyono təfrığə vəy qəteyro bıə roli nışon doydə.
Erjinə həmzıvonon qıləy ruj pəyğombəre-əkrəm(s) bəştə kə daxil be və çə həzrəti əshob həm omin daxil bin.çe səhobəon ədəd ziyod be və otağ pur bıəbe.bın zəmon mısılmınonku qıləyni varid be, əmmo bo nıştero qıləy vırəş pəydo kardeyış nızıne və çe bə nezi nışte.pəyğombəri(s) ıştə əboş peqəte doşe bəy və voteşe:”ın əbo ıştə jiyədə oğand”.həmonə merdi əboş peqəte bəştə dimiş dəsuye və binoş kardey əy pusə karde.qıləy holədə ki,ıştə çəşon arsi ru kardedəbe.peşo əvış to karde və bə pəyğombəre-əkrəmi(s) dimış qəte və voteşe:”az hiçvaxti şımə əbo peyo nibənışte. Xıdovənd tıni qiromi bıko,çoko ki,tı mını əziz qəte”.pəyğombəre-əkrəmi(s) bəştə çəp iyən rostiş nəzə karde və peso hamyeşe:”havaxti şımə palu qıləy mehtərəmə merd ome,əy əziz bıqətənən və həmçinin hakəs ki,dəvardə zəmoniku şımə qıyədə qıləy həxış bıbu,əy qiromi bıqətənən”…..
