Ostoro sakinon qıvoninə quzəron.

Ostoro şəhəri de İroni sərhədədə ğəror qətəşe. Şəhərədə 20 həzo, şəhrestani həmməyədə isə tosə 70 həzo əhali jimon kardedə. “Azadi radio” şəhəri Səməd Vurğun kuçədə 4 və 5 mərtəbuninə binaon kanalizasiya sistemi bərbadə vəziyyətiku xəbə doəşe. Çəvrəy sakinon bə radio muxbiri votəşone ki, kanalizasiya xətton vılo bıe səbəbiku, çırkov bə bina zirzəmi ru bedə. Ətrofi buəvilə eqətedə.

1 numrəninə bina əji Sevda Şiniyeva qəp jəşe ki, ım binaon Soveti zəmonədə inşa kardəşone. Kanalizasiya şəbəkən normal ko kardedəbe. Peşo əvon vaxtədə təmir nıbe qorə dəbindien və ısət lırdinə ovon bə bina zirzəmi ru bedə. Muçək, muzi ətrof eqətəşe. Buəviləku soədə nəve bedəni. Akif Abbasov, Ceyhun Rzayevən bı məhəllədə jidən. Əvonən qırey kardəşone ki, məhəllə antisanitariya vəziyyətədəy. Şəhəri mərkəzədə ım curə beaburinə vəziyyət şəhəri rəhbəriyyəti ğətiyyən norohət kardedəni. Muhəndis Asən Həşimli ğeyd kardəşe ki, Ostoro şəhərədə umumən kanalizasiya şəbəkə ni. Soveti vaxtonədə jıqo sistem hestbe, normal koən kardedəbe. Peşo həmə çe vəco qınie, vılo bıe. İsət jıqo qıley beaburinə vəziyyət bə əməl omə.

Ostoro şəhrestani dionədən əhali quzəranədə problemon həddo ziyode. Ojəkon, Həmoşəm, Əsxənəkon, Siyoku dionədə  aktiv vajiə ərazion hestin ki, əyo çand qılə kə de rıjie xəto vəbəvəy. Ojəkon diədə İradə Dadaşova jiə kə 2018-minə sori avğistədə buməlarzə rıjniəşe. Isət əv deştə hovə bo kaqə loni nəzərədə qətə bıə 12 kv.metrinə dəxmədə jidə. Ey bə muxbiri votəşe ki, həni vırə mandəni ki, muraciət nıkəm. Hiç qıley təşkilat bey komək karde bəştə qiy peqətedəni. Diy sakin Rafiğ Baxşıyevi bo muxbiri qəp jəşe ki, diədə jıqo ğəzoninə kəon veyin. Mustəğiləti vaxtiku çəmi 3-4 nəfəri boştə tojə kə inşa kardəşe ki, əvonən Rusiyadə ko kardəkəsonin. İyo mandəkəson isə nəinki ıştə kəon təmir karde imkanşon ni, hətto krediti dılədə tasedən.

Rayoni Fevğəladə Halon Komissiya sədr Allahverən Mahmudoviən etiraf kardəşe ki, dionədə ğəzaninə vəziyyətədə kəon veyin. Prezidenti muvafiğ sərəncomi əsasədə  haliyədə 36 mənzilinə bina inşa bedə. Vəoməyonədə qıley 48 mənzilinə bina inşa kardeyən planədə heste.