Tramp fəlokət nomo bıə rujədə Amerkə səfarətxanə bə Ğuds ovoştoniye məğsədış heste, Fələstin mığovimətiyə qurupon xəbə dortion.

Amerkə xarıci vəzarətxanə zinə elanış kardə ki Mayə manqi 14 Telaviviku Amerkə səfarətxanə bə Ğudsi işğal bıə ərazi ovoştoniye bəbe, qıləy ruj ki Fələstini işğal bey sorqardışe ijən Fələstinıjon tərəfiku fəlokət nom noə bəy.

Bə Anadoli aqentiyəti raporti əsos cəhad islamiyə təşkilat ım ğəroli elan bey bəpeştə çı Amerkə jıqonə siyasəton bə məntəğə əmniyyət və stabiləti zərbə varid karde iyən təhdid ijən siyonist rejimi rəsmi şəxson terroristiyə hərəkəton peştədə mande zınəş be.

Fələstin islamiyə cəhad təşkilati tojə bəyoniyədə ğeyd bıə fəlokət nomo bıə rujədə Amerkə ım ğeyri ğanuniyə ğəroli icra karde nışo doyə ki siyonist rejimi cinoyəton əvəzi Amerkə bə ım rejim mıkofat doe fikədəy və hol ım ki Mayə manqi 14 çı Fələstin və bəşəriyəti tarixədə işğal iyən cinoyəti ruj ğeyd bıə.

Fələstin milli Təşəbbos hərəkati sədr Mustəfa Əlbərəğosi həm çı Amerkə ım hərəkati vey təhrik əkə hisobış kardə ki Fələstin azadi əbaxş onemonon bəbe vey rə bəy elmiyə reaksiya nışo bedə ijən de siyonist işğal əkə rejim əmniyyəti həmohənqion kamilən ləğv bıbu.

Çımiku bə nav Fələstin moxtar təşkilati rəis Məhmud Əbbas və Həmas təşkilati sıxənəvot Əbdullətif Əlğanue həm co bə co bəyoniyəonədə çı Amerkə ım hərəkəti məhkum kardən.

Dəvardə sori Dekabri 6 ijən məntəğə və dınyodə çandə etırazon jiədə əmmo Amerkə prezident Donald Tramp elanış kardə ki Amerkə Ğudsi bənə siyonist rejimi paytəxt zınəydə ijən ıştə səfarətxanə bə Ğuds oştoniyə məğsədış heste.