Zərif: DAEŞ ısət həm Asiya ğərb və çəyku bəpe qıləy mıvcudə həğiğəte; məntəğə kişvəron miyono votımoni zəruriyat.

İroni xarıci vəzir bə məntəğədə DAEŞ-i fiki və puliyə sutuni hestemon işorəş kardə və votışe: DAEŞ hələ həm Asiya ğərbədə və dınyoədə qıləy mıvcudə həğiğəte.

Tehronədə pəsa DAEŞ nomo bıə olqo iclosədə Muhəmməd Cəvad Zərif Asiya ğərbədə xarıcion mıdoxiləon çı DAEŞ-i hestemoni dəvom iyən noəmnə vəziyəti illət zınəş be və əlovəş kardə: şayəd sərzəmini cəhətiku İŞİd məhv bıə əmmo çı DAEŞ-i bino əkə fiki, puli və icod əkə zəminəon hələ həm vıcudış heste.

Zərif DAEŞ terroristiyə qrupi bə İrağ həmlə kardeku Amerkə siyasəton, ərəb dınyoədə milli dıvləton icod nı bey iyən milləti əğidə və fiki poymol karde nəticə zınəş be və votışe: məntəğə bəzi kişvəron əcumlə Ərəbiston cəhd kardən ki ıştə daxıli mışkilaton mınhərif və bə xaric nesbət bedon və ısət əvon ərəb dınyoədə niqəranion mınhərif karde sahədə əvon bə qıləy xarıci deşməni tərəf hərəkət kardən.

Zərif DAEŞ-i vindımoni xətəri barde təsdiğış kardə: DAEŞ-i i dastə qrupon ki hələ məhv bə nin ısət bə dınyo və muxtəlifə məntəğəon əcumlə Əfğanestani tərəf hərəkət kardən.

İroni xarıci vəzir ijən bə İroni plan, Fars dıyoədə məntəğəiyə votımon icmma icod karde işorəş kardə və votışe: bəzi məntəğə kişvəron məntəğə əmniyyəti bə İroni əleyh təhdidon əsos kəşəşone və de silohinə xərcon əmniyyəti soxtə fikədən əmmo bəbe jıqonə səhvə strateqiyaon əvəzi hevojə əmniyyət iyən votımoni fikədə bıbun.