Fars dıyo əmniyyət de məntəğə kişvəron bəpe təmin bıbu.

İroni prezident Fars dıyo əmniyyəti təmin karde xoto xrıci kişvəron iştiroki ğeyri lazim zınəş be və votışe: məntəğə kişvəron de vəhdət, i bemon və votımon karde bəznın ıştə əmniyyəti oqəte.

Həsən Ruhani ımruj İ.roni dıvlət kabinet iclosədə bə Fars və Umman dıyoədə əmniyyəti koalisiya barədə zohiri və ğeyri aməli iddeo işorəş karde və votışe: Fars dıyoədə bənə siyasəton fəğət təfrəğə icod karde iyən məntəğə və islami kişvəron pul-servəti ğarət kardeye.

Əv bə məntəğə ədə sionist rejimi iştirok və huzuri poç bey iddeo işorəş karde və votışe: sionist rejim çok bəbe ki ıştə əmniyyəti təmin bıkə.

İroni prezident bə har vırə ədə sionist rejimi noəmnə hərəkəton, cinoyət və terror siyasəti işorə və təkidış karde: məntəğə ədə qırd canq və cinoyəti əsliyə amil sionist rejime.

Ruhani bə İroni ciddi və komilə iradəon de hamsoyə və islami kişvəron həmkari karde işorə və bə Fars dıyo saheli kişvəron xətob votışe: İron bənə dəvardəyon karde bəzne de məntəğə kişvəron həmkari Fars dıyo əmniyyəti oqəte.

İroni xarıci vəzir Muhəmməd Cəvad Zərif həm tojədən bə Fars dıyo xarıci ğıvvon və hərbi qəmion daxil bey təhdid şərayeti ziyod karde nımonə zınəş be və təkidış karde ki əqə Amerkə pidəşe dıyo vonti əmniyyətədə əncom bıbu bəpe ıştə be stabiləkə rəftori vəy beqəti.

Imruj həm İroni dıvlət sıxənəvot Əli Rəbie jurnaliston cəmədə təkidış karde ki Fars dıyo əmniyyəti oqəteyro İron karde bəzne de məntəğə kişvəron muzakirəon bino bıkə.