İrağiku anti İron hərəkəton əncom nibəbe; Amerkə anti muğavimət hərəkəton dəvom kardedə.

Bəğdadədə İroni səfir İrəc Məscedi votışe: İrağ çı İŞİD-i təhdid, işğal və noəmni şərayetiku dəvarde və ısət qədə qədə bə stabiləti tərəf şedə.

Əv votışe: İron həmişə İraği milləti kənoədə ojə oşko bə ım kişvəri əmniyyəti komək kardedə.

İrəc Məscedi bə İrağədə İroni nıfuz işorəş karde və votışe: Tehron və Bəğdadi miyono əloğəon dəvom peydo bəkarde hətto əqə Amerkə norohət bıbu boçi ki 2 qılə kişvəri miyono coəti ığande imkanış ni.

Bəğdadədə İroni səfir bə 2 qılə kişvəri miyono ticarəti miğdor işorə və əlovəş karde: İraği tojə dıvlət həm de İron iğtisadi həmkarion inkişof doe fikədəy.

Əmmo İraği əmniyyəti oxonə vəziyətiku həm xəbə ome ki tojədən parlaentədə Əlfəth partiya nımoyəndə Muhəmməd Əlbəldavi Amerkə anti Həşduş-şəəbi hərəkətonku xəbəş do və votışe: Amerkə pidəşe de xəbisə planon İrağədə Həşduş-şəəbi muğavimət qrupi məhv ya xot məhdud ko.

Tojədən İrağədə İŞİD terroristiyə qrupi mandə uzvon dastqir bey bəpeştə xəbə ome ki prezident Bərhəm Saleh DAEŞ-i uzvon beynəl xalğ məhkəməonədə muhakimə tələbış karde.

İrağədə DAEŞ terroristiyə qrupi cinoyəton dəvomədə tojədən bə muğavimət vabəstə bıə məşhur koşınas Heşam Əlhaşımi terror bıə; İraği muxtəlifə muğavimət qrupon ım terrori məhkum kardışone.