Şəmxani bə Trampi xitob votışe: vey şiddətinə intiğomon intizorədə bıbən.

İroni milli əmniyət ali şura sərkatib İron iyən İraği milləti çı muğavimət şəhidon xuni xisos sıə kəson bə hisobış varde iyən bə Terampi xitob votışe: vey şiddətinə intiğomi çəş kənən.

Əli Şəmxani ıştə tojə Tvitter mesajədə Qeneral şəhid Ğasım Suleymani iyən şəhid Əbu Məhdi Əl-Muhandesi terrorədə bə Amerkə rol iyən Donald Trampi sərostə cinoyəti işarə iyən ğeydış karde: İron iyən İraği milləti ım şəhidon xuni xisos sıə kəson iyən tosə amilon cəzo doe faxti orom nibəben.

İslami inğilabi nığo doə Ğuds ğıvvə fərmondə qeneral Ğasım Suleymani ki dəvardə sori yanvari 3 de İraği rəsmiyə şəxson dəvəti bə ım məmləkət səfərış kardə be de Amerkə mutəcavez və  terroristiə ğıvvon həmlə Bəğdad aeroporti nezi şəhid be.

Im terrorə hucumədə İraği Həşduş-Şəbi muğavimət qrupi muavin Əbu Məhdi Əl-Muhandes iyən 8 nəfər de əvon bə ico bıə rəzməndəon həm şəhid bin.

Im cinoyət və terror de Amerkə prezidenti sərostə əmri əncom bıə.

İroni Yolə Rəhbər Həzrət Ayətullah Xamenei tojədən de İraği i minnə vəzir Mustəfa Əl-Kazımi vindemonədə Qeneral şəhi Ğasım Soleymani iyən şəhid Əbu Məhdi Əl-Muhandesi terrorədə Amerkə cinoyəti çı Amerkə hərbi işteraki nəticə bə hisobış varde iyən təkidış karde ki İron hiç faxt ım məsələ çı yodo benibəkay və hukmən bə Amerkə mıtəğabil zərbə bəjəne.