Pars Today

Bə Beytullahelhərami hacion, İroni Yolə Rəhbəri mesaj

بسم الله الرّحمن الرّحیم

والحمد لله ربّ العالمین و صلّی الله علی محمّد المصطفی و آله الطّاهرین و صحبه المنتجبین

Əziz iyən Həkimə Xıdovəndi şık kardedəmon ki həcci mıborəkə zəmoni ijən çı mısılmonə milləton yande mulağat kardə vırə ğərorış do iyən ın fəzilətin və rəhmətinə roy bə çəvon tərəf ojış kardə. İslami ummət ısət sənibəton ıştə vəhdət və ibemoni həminə şəffof və əbədi oveynədə bıvindo və çan poə bey iyən təfrəğə ənqizəonku diyəro bımando.

Mısılmonon miyono vəhdət çı həcci əsosi prinsiponku qıləyni bə hisob omeydə ki əqə de ın sirrinə fərizə coqılə əsosi poyə yəni de zikr və mənəviyəti bə ico bıbu karde bəzne islami umməti bə izzət və səadəti ovc bırosno və əy bənə “وَ لِلَّهِ العِزَّةُ وَ لِرَسولِهِ وَ لِلمُؤمِنین” nımonə ğəror bıdə. Həc ın 2 qılə siyosi iyən mənəvi prinsipon de yande umuj qıniyey nəticəy iyən islam muğəddəsə din siyosət iyən mənəviyəti de yande əzəmətinə coh-cəlolinə surəti umuj qıniyə dine.

Tojə soronədə çı mısılmonə milləton dışmenon veyə cəhdışon be ki ın 2 qılə jimonəbaxşə prinsipon yəni vəhdət iyən mənəviyəti çəmə milləton miyono zəif bıkon. Mənəviyət prinsipi de mənəvi rufiku teyli bıə iyən bə maddi kırtə diyəş bıə ğərbi jimoni səbki rəvoc doe kamranq iyən zəif kardedən iyən vəhdəti de təfrəğə icodəkə be əsosə ənqizəon bənə zıvon, ranq, irğ və cuğrafiya şiddət doe iyən hevuj kardey bə problem eğandeydən.

İslami ummət ki ısət çəy qədə nımonə həcc simvolinə mərosimədə vindey bıdə, bəpe dıştə həmmə vucudi muxalifət kardeyro rost bıbun, yəni itərəf Xıdo ıştə yodədə dəğande, Xıdoro ko kardey, Xıdo kəlomədə tədəbbur və bə xıdo vəədəon xatircəm bey prinsipon ıştə umumi fikədə oqəton, iyən co tərəf ixtilof iyən təfrəğə ənqizəon vədə səbarz bıbun.

Imruj de ğətiyət jığo votey bıdə ki dınyo iyən islam dınyo ısətnə şəroyet həminə erjinə koy bə vırə rosniyeyro harzəmoniku vey hozzı bıə.

Çunki əvəllən ımruj islami kişvəronədə bıə elitaon və umum iştimaiyətiku vey odəmon bəştə mərefəti iyən mənəvi sərvəti diğğət kardəşone iyən çəy əhəmmiyət və erjiku aqahin. Imruj ijən liberalizm və kumunizm bənə ğərbi sivilizasiya muhimmə hədyə dəvardə sa soron və 50 soron coh-cəbərot iyən ğəşənqionışon ni. Ğərbi bə puli əsos bıə demokratiya  abru-həyo de ciddi sovalon dim bə dime və ğərbi alimon etırof kardən ki elmi iyən zıney sərqərdoni dıço bıən! İslam dınyoədə bıə cıvonon, alimon, elm iyən dini merdon dehəminə vəziyəti muşahidə kardey bəştə mərefət sərvəti iyən ıştə kişvəronədə bıə siyosi meyl iyən roy barədə tojə vindemoni bə dast vardəşone, ki ın həmonə islami oğoətiye ki həmmişə əy yod kardedəmon.

Sanyən, həminə islami ıştəni zıney və aqahi, qıləy əcib və bənə mocizə bıə hərəkəti islam dınyo dılədə ofəyəşe ki istikbori ğudrəton de şiddəti çəy vədə bə problemoni dıço bıən. Həminə hərəkəti nom muğaviməte ki çəy həğiğət, imon və cihod və təvəkkul ğudrəti oşko bey heste. In hərəkət həman koy heste ki çəy barədə qıləy nımonədə iyən sədre islomədə ın şərifə ayə nozil bey bois bıə:

 “اَلَّذینَ قالَ لَهُمُ النّاسُ اِنَّ النّاسَ قَد جَمَعوا لَکُم فَاخشَوهُم فَزادَهُم ایمانًا وَ قالوا حَسبُنَا اللهُ وَ نِعمَ الوَکیل. فَانقَلَبوا بِنِعمَةٍ مِنَ اللهِ وَ فَضلٍ لَم یَمسَسهُم سوءٌ وَ اتَّبَعوا رِضوانَ اللهِ وَ اللهُ ذو فَضلٍ عَظیم “.

Fələstinədə bıə səhnəon həminə təəcubinə hərəkəti oşko nımunəy ki sionist toğyanəkə rejimi çı yoləşəxəti karde və hucum şəroyetiku bə mudafiə iyən zəifəti əvəz ko və siyasi iyən əmniyyəti və iğtisodi behroninə vəziyəton ki ısət oşko bıə bə ın rejimi icbor bıko. Muğavimətiku coqılə nurani və dəvəşə nımunəon həm karde bəbe Livan, İrağ, Yəmən və co məntəğəonədə muşahidə bıbu.

Salisən həmmə ımom kənoədə, dınyo ımruj islamiyə İronədə qıləy muvəffəğ ulqu iyən islami siyosi hakemiyətiku qıləy səbarzə ğudrəti muşahidə kardedə. İslami respublika izzət və inkişof və istiğlol və stabileti qıləy əzəmətin, cəzbəkə iyən mənoiinə hodisəy ki karde bəzne har oğoə mısılmoni əndişə və hisson bəştə tərəf cəlb bıko. In nizomi zəifəti iyən bəzi faxt əmə rəsmi şəxson səhvə koon ki bə islami hakemiyəti həmməy bərəkəton dast peydo kardeyro tikəy təxirış eğandə hiçfaxt bə iı nizomi prinsipon əsos bıə zumandə ğədəmon iyən poyəon zərbə varid bıko ya çəy moddi və mənəvi inkişofi vədə mane bıbu. Həminə əsosi prinsipon sədrədə, ğanunədə islami hakımiyət və əmələdə islami mehvəriyət, kişvəri mudiriyət muhimmə koonədə bə milləti nəzəon təkyə karde, komilə siyasi istiğlol və bə zılməkə ğudrəton meyl peydo nıkarde ki karde bəzne mısılmonə dıvlət iyən millətonro həm bənə vəhdət icodəkə prinsip bıbu və cəhət iyən həmkarion çərçivədə islamiyə umməti de yande bə i co hərəkət bıdə, mıttəfiğ bıko.

Imon həmonə zəminə və amilonin ki bo vəhdət iyən I bey çı islam dınyo ısətnə çokə vəziyəti icodış kardə. Mısılmonə dıvləton, dini və elmi elitaon iyən mıstəğil ruşinfikon və həğiğəti dumoədə bıə cıvonon harkəsiku vey bəpe bə həminə çokə zəminəonku istifodə karde fik bıkon.

Təbii məsələy ki istikbori ğudrəton və həmmə kəsonku vey Amerkə, islom dınyoədə bıə jığonə meyliku niqəron bıbun və çəy vəyqəteyro ıştə həmmə imkanati bə meydon varid kon ki ısət jığo vindey bıdə. Media emperiyaku tosə namə canqi şivəon, tosə canqi otəşi rost kardey iyən niyobəti canqon, tosə şəytoni vəsvəsəon iyən siyosi pesoxtə xəbəon nəşr doe, tosə təhdid, tətmi iyən karrupsiya, ımon qırd Amerkə və co mıstəkbiron tərəfo istifodə bıdə ta islam dınyo çı səadət iyən aqahəti royku co bıbu. In məntəğədə bıə sionist cinoyətkor iyən siyohə dim həminə həmmətərəfinə cəhdon əbzaronku bə hisob omeydə.

Bə İlahi fəzli iyən irodə əsos ın cəhdon vey baxşonədə məğlub bıə iyən mıstəkbirə ğərb çəmə həssasə məntəğə iyən tojədən dınyo həmmə vırəonədə har ruj dəvardə ruji muğaisədə vey zəif bıə. Amerkə və çəy mıttəfiğon xususi məntəğədə bıə çəy həmkarə cinoyətkorə işğalçiyon pərişoni və məğlubiyət, ısət Fələstin, Livan, Suriyə, İrağ, Yəmən və Əfğanıstonədə vey oşko surəti muşahidə bıdə.

Çəy muğabiədə, islam dınyoədə ənqizə soyb bıə cıvonon purin. Tale soxteyro vey yolə sərmoyə umid iyən bəştə nəfsi etemo kardeye ki islam dınyoədə xususi ın məntəğədə bıə kişvəronədə hevuj surəti vindey bıdə. Həmmə kəson ko ıme ki ın sərmoyəon oqətəmon və bəy əlovə kəmon.

De ın vucud, çı dışmenon hilə və dışmonə planonku I ləzə həm ğəflət kardey coiz ni, yoləşəxəti iyən ğəflətiku diyəro bıbəmon və bəştə səyo-cəhdon iyən huşinəti əlovə kəmon iyən ıştə həmmə hol-əhvolədə de diğğət iyən oh-nolə Ğadir və Həkimə Xıdoku komək tələb kəmon. Həcci fərizə iyən mərosimədə iştirok qıləy yolə fırsəte ki təfəkkur, oh-nolə, fik iyən ğərolon təiin kardeyro hozzı bıə.

Dınyo həmmə vırəonədə bıə ıştə həmmə mısılmonə bıvəon iyən hovəon dıvo iyən çəvon səbarzəti tovfiği Xıdoku tələb kənən. Bəştə ın bıvə İlahi komək və hidoyəti şomil bey dıvo həm ıştə zikronədə nəzərdə bıqətən.

والسّلام علیکم و رحمةالله

Seyd Əli Xameni

Hici Ğəməri 1443 minnə sori Zil-Həccə manqi 5

Hicri Şəmsi 1401 minnə sori Tir manqi 14