Təlim iyən təhğiğ baxşədə, İron və Suriyə həmkoətion hevujəti.
Suriyədə, təlim və təhğiğon həmkoətion bə inkişof rosniye barədə, İron İslam Respublika səfir iyən Suriyə elmi təhğiğon iyən ali təlimon vəzir de yande sıhbətışon kardə.
Bə İrna raporti əsos, Dəməşğədə Suriyə elmi təhğiğon və ali təlimon vəzir Bəsam İbrahim, İron İslam Respublika səfir Mehdi Sobhani vindemonədə bə 2 qılə kişvəron miyono imzo bıə icraiyə bərnoməon, elmi mıtəğubilə səfəron, onemonon iyən konferanson bərpo kardey iyən Suriyə və İroni universition miyono mıştərəkə elmi təhğiğon iyən təcrubəon mıbodilə kardey işorəş karde.
Im vindemonədə həmçınin Suriyədə bıə İron İslam Respublika səfir təkidış karde: bəpe Dəməşğiku Tehroni himoyə, 2 qılə kişvəron miyono elmi həmkoətion zumandəti, elmi baxşonədə mıştərəkə fəaliyəton iyən koon bino bıbun iyən 2 qılə kişvəron mənafe cəhətədə və kali mıvzoon barədə mıştərəkə kumitəon icod bıbu.
İron İslam Respublika de Suriyə stratejikə həmkoətion əncomış do və həminə mıvzo nışonə ıme ki Suriyə bıhroni mıddətədə Tehron ım ğanuniyə dıvlətiku himoyətış kardə, həmçınin terroristiyə muxtəlifə qrupon mobarizə bardey prossesədə bə Suriyə ğanuniyə prezident, Bəşşar Əsədi dıvlət komək kardəş be.
DAEŞ qrupi məğlubiyəti bəpeşt, Suriyə iyən İroni miyono rabitəon ısət vey hevuj bıə iyən umid heste həmmə baxşonədə ım rabitəon bə inkişof bırəsi.
