İrağıjə kinə kıştey bəpeşt sosial şəbəkəonədə bıə reaksiyaon.
Çəy bəpeşt ki İraği Əbuğorəyb məntəğədə Amerkə hərbion nıvcıvon Zeynəb Esami kıştışone ısət sosial şəbəkəonədə bə həminə cinoyəti zumandə reaksiyaon dəvom kardeydə.
De ım vıcud ki Bəğdad iyən Vaşenqton miyono çand dıvrə stratejikə muzakirəon əncom bıə və ğəror be ki de DAEŞ-i vədə mubarizəon sə bey və İraği parlamentədə həm xcarıci həmmə hərbiçion ixroci plan təsdiğ bey bəpeşt İrağədə bıə Amerkə hərbi iştirok həm bə oxo bırəsi, əmmo Amerkə ım prinsipon darşiyəşe və həmçınan İraği sərzəminədə iştirokışe.
Bə Roc Niyuz internetiyə mərkəzi raporti əsos, de Amerkəvıjə hərbiçion vositə, Zeynəb Esami kıştə bey dumoədə, İrağədə virtual fəzo ko kardə kəson nıvıştəşone: ısət, Amerkəvıjə hərbiçion ixroci zəmon rəsə, ta zəmoni ki İraği kişvərədə, Amerkə bazaon mucudin, İraği millət, əmniyyəti ləzəon hiss nıkon.
İrağədə virtual fəzo ko kardə kəson ijən nıvıştəşone: Amerkə hərbiçion çəmə hırdənon kıştey bois bəben, jəqo ki Zeynəb Esam ki beqınoh be şəhid bıə.
Bə ım raporti əsos, Bəğdadi əməliyoti kamandir, Zeynəb Esami kıştə bey barədə ki İraği milləti əsəboniyəti dumoədə be ıştə təhğiğon binoş kardə.
Miladi 2014 minnə sorədə, Amerkəvıjə hərbiçion, bə İraği dıvləti tələbi əsos və de DAEŞ-i terroristiyə qrupi mubarizə kardey cəhəto, bə İrağ varid bin, bə həminə bəhonə, Amerkə qıləy koalisiya ğolibədə ki bə DAEŞ-i zidd məşhur be 3000 hərbiçion bə İrağ varid kardə, ım mığdoriku 2500 nəfər Amerkəvıjə hərbiçion bin, əmmo Bəğdadi tərəfiku DAEŞ-i məğlubiyəti bəpeşt, İraği dıvlət iyən millət təkidışon kardən ki bəpe xarıci hərbiçion ım kişvəriku xarıc bıbun.
