Əbubəkr Əlbəğdadi vido xutbəş handə.

Daeş terroristiyə qrupi sərkərdə qıləy nıtğədə ki məvuji vido nomış noə bıə bə ıştə pesoxtə bıə dıvləti məğbuliyət etırofış kardə ijən çın qrupiku tələbış kardə ki bə bandiyə məntəğəon fəror bıkən və pənoh bebən.

Bə İrna raporti əsos İraği Şimalədə bıə Neynəva ostaniku qıləy oğoə mənbə elanış kardə ki İşid terrorçiyə qrupi sərkərdə ım nıtğədə ojə oşko etırofış kardə ki tojə dıvrə daveonədə məntəğədə məğlub be ijən çəy tərəfdaron lozime ki İrağ və Suriyə bandiyə məntəğəonədə məxfi bıbon.

Əv həmçınin ım nıtği nomış vido xutbə elanış kardə.

Əlbəğdadi çı Daeş terroristiyə qrupiku tələbış kardə ki İraği ğıvvon mıhusirədə qiriftor bey zəmonədə ıştəni intehar bıkən iyən betepnon.

Im oğoə mənbə elanış kardə ki daeş terroristiyə qrupi ali sərkərdəon şura ki çəy nom Mıcohidon Şura ğeyd bıə İraği Təlle Əfər ijən Neynəvaku bə Suriyə tərəf fəror kardəşone.

Jıqonə xəbəon qıləy şərayetdə pevılo bıdə ki dəvardə haftəku de İraği i minə vəzir Heydər Əlebadi əmri bərobər Musoli ğərbiyə məntəğə ozod karde əməliyat de 100 həzo nəfər İrağıjə ğıvvon huzuri bino bıə.

Musol İrağədə bənə Daeşi uzvon əsliyə mərkəz hisob bıdə ki çəy şərğiyə baxşi ozod karde bəpeştə ğərbiyə hissə həm çand cəhbəku ozod be ijən əməliyaton həmçınan dəvomış heste.