Ğətər çı Ərəbistoni pesoxtə hərbi koalisiyaku ixroc bıə.

Bə Yəmən təcavozkarde xoto çı Ərəbistoni pesoxtə bıə koalisiya fərmondehi ımruj elanış kardə ki koalisiyaədə Ğətəri iştirok ləğv bıə.

Bə Fransə aqentiyəti raporti əsos Bəhreyn, Misr, Ərəbiston və İ bıə Ərəbon Əmirti kişvəron de Ğətər diplomatikə rabitəon ləğv kardeku çand saət bəpeştə bə Yəmən təcavozkarde xoto çı Ərəbistoni pesoxtə bıə koalisiya çın koalisiyaədə Ğətəri uzvoyəti ləğv beyku xəbəş do.

Pesoxtə bıə koalisiya iddioş kardə ki nızə şərğədə bə Ğətəri bevəcə tojə siyasəton xotoe ki bə ım kişvəri zidd məhdudiəton icod bıə.

Im mərkəz elanış kardə ki Ğətər məntəğədə ijən Yəmənədə Əlğaedə və Daeşiku himoyə kardedə və bə çəy fitnəkorə siyasəton xoto çəy uzviyəti ləğv karde lozime.

Ğətər və Fars dıyo hamsoyə Ərəbə kişvəron miyono daveon çı Ğətəri qıləy xəbəiyə mərkəzi hək bey bəpeştə bə problemon dıço bıə ki Donald Trampi bə Ərəbiston səfər karde bəpeştə vey şiddətin bıə.

Həmzəman xəbə omə ki Bəhreyn, Ərəbiston, Misr və İ bıə Ərəbon Əmirti həm ımrujnə rujiku de Ğətər ıştə diplomatikə həmkarion ləğvışon kardə.

Ərəbiston de Amerkə icozə iyən bəzi kişvəron qıləy pesoxtə bıə koalisiya çərçivədə ısət 2 soriku veye ki bə Yəmən hucumışon kardə ta Yəməni milləti mığoviməti vılo bıkən əmmo detos bə ısət rısvo bıən.