Amerkə və Pakistoni miyono rabitəon bə yande qıniye.

Pakistoni ləşqəri sıxənəvot Asef Ğəfur Pakistoni əleyh Amerkə tojə təsdiğ bıə ğəroli hərbi və mali koməkon ğət karde barədə votışe: ım ğərol yəğin çı Amerkə zərəl-ziyoni bois bəbe.

Asef Ğəfur əlovəş kardə: bo terroristonro Pakistonədə hiç əmnə vırə ni ijən Pakistoni əleyh Amerkə iddiyaon beəsose.

Çimiku bə nav həm çı Pakistoni İnsof Təhrik partiya rəhbər Omran Xan həm təsdiğış kardə ki Pakiston bəbe Amerkə blokaku xaric bıbu ijən votışe: bə inkişof rəseyro İslam Abad bəbe bə İron, Çin və Russiyə izofə bıbu.

Pakistoni maliyə vəzarətxanə təsdiğış kardə ki Amerkə ijən bə Pakiston puliyə koməkonku bə kəno mandəy və 255 milyon dollar çı Amerkə koməkon ğət bıə.

Tramp tojədən Pakistoni barədə ıştə kişvəri tojə strateqiyaon elan karde cərəyonədə Pakistonış bə terroriston pənoh doe mıttəhəm kardə ki ım sıxən Pakistoni rəsmi şəxson norohətəti bois bıə.

Amerkə iddiaş kardə ki Pakiston, Əfğanestanədə terroristiyə qrupon peştədəy və ım himoyəon əyo no əmnion hevujış kardə və hol ım ki Əfğanion ım kişvərədə İŞİDİ hevujəti çı Amerkə huzuri sayədə hisob kardən.

Isət çand haftə heste ki Pakistoni muxtəlifə şəhronədə bə Amerkə siyasəton etıroz kardero aksiyaon bərpo bedə.