Cəhanqiri: Avropa çı İroniku xarıc bıə bəzi şirkəton həxi doe zomin bəbe.

İroni prezidenti i minə muavin bo ətomiyə sazışi hifz karde bə Avropa edaştə bıə tojə təklifon vəzyəti işorəş karde iyən votışe: Avropa İroniku xarıc bıə bəzi ğəyri dıvləti şirkəton həxi doe zomin bey xoto miyonə iyən rukə şirkəton və navi vində bıə roonku istifodə bəkay.

Eshağ Cəhanqiri zinə de İrna aqentiyəti mısohibədə bə ətomiyə sazışiku Amerkə xarıc bey bəpeştə İroni cəhdon ijən ım muğavilə mənafeku istifodə karde, işorəş ka və votşe: İron bo ətomiyə sazışi oroxniye və ya ım təvafuği dəvom doe, lozimə tədbironışe və əvoni icra kardey xoto kişvəron reaksiyaon intizori kəşdə.

İroni prezidenti i minə muavin əlovəş karde: ətomiyə sazışiku Amerkə xarıc bey bəpeştə ım kişvər təcridi holətədəy əmmo çı əvəzi məntəğədə həmmə kişvəron ğərəz çand qılə rejim İroni vindemoniku himoyədorəti kardən.

Imsornə Mayə manqi 8 ətomiyə sazışiku Amerkə ğeyri ğanuni və i tərəfiyə holəti xarıc bey Bəpeştə, Avropavıjə kişvəron ım beynəl xalğiyə təvafuği oqəte bə kəno İroniku tələb kardeşone ki de ətomiyə sazışiku Vaşenqtoni xarıc bey vocudi İron ijən bə ım təvafuğ pobənd bımando.

Im təvafuği foydonku istifodə və de Amerkə sanksiyaon muğabilə kardey xoto ətomiyə sazışi hifz karde İron və Avropa miyonə muzakirəon, ijən dəvom kardedə.

Amerkə prezident Donald Tramp Avquestə manqi 6 əmrış doə ki bə İroni əleyh kali ğeyri ğanuniyə sanksiyaon, ğızıl və maşin soxte baxşonədə ijən bino bıbu.