Zərif: Avropa bəpe ətomiyə sazışiədə bəştə siyosi təəhhudon əməl bıkə.

İroni xarıci vəzir təkidış karde: Avropa bo ətomiyə sazışi oqəte muxtəlifə şivəon edaştəşe əmmo əvon bəpe siyosiyə təəhhudon kənoədə bo ətomiyə sazışi oqəte əməliyə cəhdon həm əncum bıdən.

Muhəmməd Cəvad Zərif zinə mıxbıron cəmədə əlovəş karde: əqə muxtəlif kişvəron ətomiyə sazışi mənafeku istifodə karde pidəşone, bəpe ım mıvəffəğə muğavilə hifz karde xoto əməli koon əncom bıdən və cı lozimə xərci tov biyən.

Zərif votşe: Amerkə nə fəğət ıştən ğanuni dəqordıniyedə, bəlkəm de fişar və təziği dınyş bə jığonə hərəkəton icbor kardedə, çən dınyo bəpe Amerkə ım hərəkəti bərobərədə muğavimət bıkən, və illa kişvəron çimiku vey hevujə xərcon bədoy.

Qıləy holədə ki Donald Tramp 2018-nə sori Mayə manqi 8, ətomiyə sazışiku Amerkə xarıc bey və bə Tehroni əleyh sanksiyaon oqorıniye elanış kardə, əmmo ətomiyə sazışi co tərəfon əcumlə Fransə, İnqiltərə, Russiyə, Çin, Almaniya və Avropa ittifoğ izhor kardən ki beynəl xalğiyə ətomiyə sazışiku ijən himoyədorəti bəkan.

Çumçiku, İron və Avropa bə çəy xoto ki ətomiyə sazış ijən hifz bıbu, ıştə sohbəton bino kardeşone.

Avropa, ım muzakirəon cərəyonədə mıttəhid bıə ki bə İroni əleyh bıə Amerkə sanksiyaon mığubilədə himoyə əkə təklifon, əv həm ətomiyə sazışi çərçivədə edaşto.

İroni xarıci vəzir ijən bə İnqiltərə xarıci vəzarətxonə Afriqa şimol və Miyonə Şərği muavin Alister Burti bə İron səfər karde işorəş karde və votışe: ım səfəri qıləy muhimmə mıvzoon, banki əloğəon və İroni nati həvoteye.

İron və İnqiltərə 2 tərəfiyə tojə sohbəton Tehronədə zinə sıb bərpo bıə.