Ğərib Abadi: İroni bə ətomiyə sazışi bəfodorəti 13 minə kərə təsdiğ bıə.
Vyanaədə bıə beynəl xalğiyə təşkilatonədə İroni daimə nımoyəndə və səfir ətomiyə sazışi icra karde barədə çı ətom enerji beynəl xalğiyə təşkilati sərdirəktori raporti nəşr bey bəpeştə elanış karde: ım raport bo 13 minə kərə, ətomiyə sazışiədə İroni barədə təəhhudon əməl karde təsdiğış ka.
Bə İrna raporti əsos, Kazım Ğərib Abadi əlovəş do: ətom enerji beynəl xalğiyə təşkilati sər dirəktori raportədə təsdiğ bıə ki ətomiyə sazışi icra bey rujiku(2016 janvar) iyən bə ım muğavilə məzmuni əsos, ətom enerji təşkilat bə ıştə nəzorət və İroni tərəfo təəhhudon dəğiğ manitoring karde idomə dodə iyən nətorəti prossesədə hiç mane və probleminə məsələ nıbe.
Ğərib Abadi ətom sazışi vədə Amerkə rəftori çok nıbe əmmo çəy əvəzi İron de məsuliyəti rəftor kardə təsdiğış kardə iyən votışe: əqər ətomiyə sazışi tərəfon ım muğavilə dəvomiyyəti tələb kardən, bəpe de təcili və mınosibə əməliyə cəhdon əncom doey ətomiyə sazışi mənafeku İroni mənafe qarantiya bıkən.
Vyanaədə bıə beynəl xalğiyə təşkilatonədə İroni daimə nımoyəndə və səfir ətomiyə sazışiku Amerkə i tərəfi xarıc bey iyən ğeyri ğanuni rəftoron ijən bə İroni zid sanksiyaon oko doe çı İ Bıə Milləton Təşkilati Əmniyyət Şura 2231 ğətnomə poymol karde zınəş be və ım siyosəti be bə dınyo umum içtimaiyəti nəzəron ehtırom nıkarde və bəy məhəl nıdoe hisob kardeşe.
Amerkə prezidenti Donald Tramp, 2018-nə sori Mayə manqi 8 ətomiyə sazışiku Vaşenqtoni xarıc bey iyən 90 və 180 ruji bəpeştə 2 kərə bə İroni əleyh ətomiyə sanksiyaon oqordıniye elanış karə. Im sanksiyaon 1 minə dıvrə Avqusti 7 və 2 minə dıvrə 2018-nə sori Noyabri 5 rəsmən icra be.
