Əfğanıstonədə noəmnə vəzyət dəvom kardedə, Kabulədə etıroz aksiyaon.

Əfğanıstonədə "Milləti Ğiyam" nomo bıə ğıvvon fərmondə Əli Pur-i dəstqir karde bəpeştə Əfğanıstoni Kabul şəhri muxtəlif cəmaəton etıroz aksiyaon dəvom kardedə, əvom Əli Pur-i rə ozodəti tələb kardedən.

Zinə rujiku ım etırozon bino bıə və ısət tojə mərhələdə polis ğıvvon iyən cəmaəti miyono davon dəvom kardedə.

Əfğanıstoni məclis səçıni nomzədon tərəfdaron həm bə intixabatədə hevojə ğeyri ğanuni hərəkəton əncon bey etıroz karde xoto ım kişvəri 9 qılə şimay viloyeton roon bastəşone.

Əfğanıstoniku xəbə ome qılə holədə ki Amerkə prezident Donald Tramp qıləy çəş nıkarde səfərədə zinə şəv bə Əfğanıston varid bıə əmmo Əfğanıstoni prezident Muhəmməd Əşrəf Ğəni cinorədə iclosədə iştirok karde xoto bə İsoveç səfərış karde.

Əfğanıstoni prezident aparay həm ım kişvərədə prezidentəti səçıni dəvoniyə zəmoni bə dom ığande barədə muntəşir bıə xəbəon rədış karde.

Tojədəy İ Bıə Milləton Təşkilatədə bıə Hındostani nımoyəndə həm Əfğanıstoni bohrani hələkə yeqanəro votımon və sulhin roon elanış karde.

Xəbə ome Taleban ıştə tojə həmlədə Əfğanıstoni Fəra viloyətədə 20 qılə polisi kıştəşon.

Faryab viloyətədə həm polis və nimə hərbion miyono dəvaon dəvom kardedə.

Kabulədə həm noməlomə şəxson ım şəhri alimon şura rəis Əbdul Bəsir Həğani terror kardışone, Helmənd viloyətədə həm xarıci ğıvvon həvoiyə həmlə nəticəku 2 qılə ğeyri hərbi kıştə və 14 nəfər zəxmin bıən.