Ruhani: Amerkə əqə otəşiku tarsedə bəpe şolə rost kardeyku bə kəno bıbu.

İroni prezident ətomiyə sazışi çı məntəğə və dınyo milləton xəyr zınəş be və votışe: Amerkə bəpe bə Əmniyyət Şura ğətnomə əməl bıkoy.

Həsən Ruhani Amerkə rəsmi şəxsonış bə de otəş hənk kardeku bə kəno mande tosiyəş karde və votışe: Amerkə i sore ki məntəğədə de otəş hənk karde binoşon karde və hol ım ki ım hənəkiku tarsedən.

İroni prezident ətomiyə sazışədə mandey barədə çı sazışi uzvon bə İron tosiyə karde barədə təkidış karde: əqə əvon bə ətomiyə sazışədə bıə ehdemonon əməl nıkon İron jəqo ki elanış karde 2 minə ğədəmi ome rujonədə əncom bədoy.

Ruhani ım ğəroli barədə muğəddəmə koon əncom beyku xəbəş do əmmo votışe ki əkə ətomiyə muğavilə çərçivədə İroni tərəfon bə ehdemonon əməl bekon İron həm rə bə sazışi dəvardə şərayet obəqarde.

Həsən Ruhani ım sazışi çərçivədə Avropa və Amerkə 2 dimə rəftoronış tənğidış karde və votışe: əqə ım sazış çokə boçi ğərb bəy əməl nıkardedə və əkə çok ni boçi İron bəy əməl nıkarde faxti dınyoədə ğil-ğal icod bıdə.

Əv Avropa maliyə mexanizm və sistemi qıləy nımayeşi və be foydə ku hisobış karde və votışe: Avropa hətto problemon həl karde xoto bə İron doe vədəon icra kardero zuş ni.