Səudiyyə Ərəbıstoni de Həcc ziyarəti əlağədar ğəror elan kardışe.

Imsornə Həcc ziyarət Ğıbonə İdi ərəfədə iyulə manqi 20-ku tosə avğusti 15-minə ruji nəzərədə qətəşonbe. Bımi ro bo Az.R şəhrıvandon 1500 nəfərinə kvota co kardəşonbe. Əmo Səudiyyə Ərəbıstonədə bə koronavirus mubtəlo bıəkəson muğdar 161 həzosən dəvardə ki, ımən co ərəbiə devləton arədə həməysən veye.

“Sputnik Azərbaycan” bə RİA Novosti istinadən xəbə dodə ki, bə ım məmləkəti Həcc və Umrə Vəzarəti pevolo kardə məlumati əsasən əvon ımsor çe xarico zəvvaron ğəbul nibəkarden, iqlə keşvəri daxilədə bıə odəmon bə Məkkə və Mədinə ocəğon ziyarət karde imkan bədon.

Ğəfğazi Mısılmonon İdarə bə “Trend” sayti məlumat doəşe ki, hələ Səudiyyə Ərəbıstoniku bəvon muvafiğ sənəd daxil bəni, qımon veye ki, bə Az.R zəvvaron Həcc şe imtina bıkardon. Çunki həm Ərəbıstonədə, həmən çəmə keşvərədə karantinə rejim tətbiğ bıə, marzon bastə vəziyyətədəy. ĞMİ rəsmi şəxsi ımən votəşe ki, Həcc ziyarət Ğıbonə idi vaxti icra bənine. Əqər çimi bəpeş bəmə icazə bıdonən, sənədon tərtib, avia reyson təşkil karde xeyli vaxt bəbarde. Əmə ım koon tosə Ğıbonə idə mərasimi rosnie nibəzınemon. Bı səbəbən çe Respublikaku bə Həcc şe ımsor mumkun nibəbe.

Tosə karantinə rejimi tətbiği 250 nəfər zəvvari bo Həcc şe ro muraciət kardəşbe. Isət çəvon avjor kardə puli bəvon obəqordınen. Imsor çe Az.R-ku bə Həcc ziyarət şe ro məbləğ 4 həzo 490 dollari ğədərədə bıe.

Məkkə şəhəri ərazi hələ ki, de korona virusə karantinə səbəbi bastə bıə.Tosə ısət Səudiyyə məmləkətədə 1307 nəfəri çe ım mərəziku vəfot kardəşe. 105 həzo noxəşin isə mualicə bıə.