Əmirəbdullahiyan: ğərbi tərəfon pidəşone Ukrayna məsələ həlliro, İron həm rol ifoəkə bıbu.

İroni xarıci vəzir votışe: ğərbi tərəfon pidəşone Ukrayna məsələ həlliro, İron İslam Respublika həm rol ifoəkə bıbu.

Bə İron İslam Respublika xarıci vəzarətxonə məlumatərosnə idorə raporti əsos, zinə şəv İron İslam Respublika xarıci vəzir, Huseyn Əmirəbdullahiyan bə Rusiyə ıştə səfəri bardə votışe: ım səfəri vey muhimmə hədəf ıme ki, bə İron İslam Respublikaku tələbi əsos, Ukrayna bıhroni həlliro, cəhd kəmon.

İroni xarıci vəzir ijən təsdiğış karde: bə 2tərəfiyə mınosibəton və Əfğanıstoni mıvzoon diyə kardey, co qılə məsələonin ki ğərore ım səfərədə çəvon barədə sıhbət bıbu.

Bə Rusiyə xarıci vəzarətxonə elami əsos, ğərore ımruj çoşəmbə, Moskvaədə İron İslam Respublika xarıci vəzir, Huseyn ƏmirƏbdullahiyan və Rusiyə xarıci vəzir, Serqey Lavrof de yande vindemon bıkon.

Dəvardə haftədə Lavrof xəbəş doə be ki ğərore vəomey rujonədə de Əmirəbdullahiyan vindemonış bıbu.

Ukrayna bıhrani bino beyku tosə bə ısət, ım 2 minnə kərəy ki İroni xarıci vəzir, Ukrayna xarıci vəziri mesaj bə Rusiyə vardedə.