Tırkiyə buməlarzə kıştə bıə kəson mığdor təğribən bə 3 həzo əlovə bıə
Tırkiyə ğeyri təbii hodisəon mudiriyəti idorə xəbəş do ki, ım kişvəri oxonə buməlarzə kıştə bıə kəson mığdor bə 2921 nəfər əlovə bıə.
Zinə Dışəmbə sıb, qıləy buməlarzə bə 7.8 rişter yoləti, Tırkiyə cənub iyən Livani şərğ və Suriyə şimol kişvəron larzedə. Həminə buməlarzə cərəyonəəd ki tosə bə ısət çand həzo nəfər ğıboni bıən, bə binaon həm veyə zərəl-ziyanon varid bıə.
Bə Tele-Rədio aqentiyəti raporti əsos, ki Tırkiyə ğeyri təbii hodisəon mudiriyəti idorəku nəğlış kardə, bə oxonə xəbəon əsos, Tırkiyə buməlarzə zəxmin bıə kəson mığdor, 15 həzo iyən 834 nəfər elan bıə.
Bə həminə raporti əsos, həmçınin Tırkiyə muxtəlifə şəhronədə 6 həzoku vey bina həm rıjniye bıən.
Tırkiyə kişvər dınyo buməlarzə şomil bıə məntəğəonku qıləyni bə hisob omeydə. Milodi 1999 minnə sorədə həminə kişvəri şimol ğərbədə, 17 həzoku vey buməlarzə hodisə dumoədə kıştə bıən.
