Bə Tehron Belorusi prezidenti səfər
Belorusədə bıə İron İslom Respublika səfir, Milodi cari sori martə manqi əvvələ nimədə, bə Tehron ım kişvəri prezidentiku xəbəş do.
Bə İsna aqentiyəti raporti əsos, Belorusədə bıə İroni səfir Səeid Yari votışe: 2 qılə kişvəri rəsmi şəxson plan kəşey holədən ki Milodi cari sori martə manqi əvvələ nimədə, Belorusi prezident bə Tehron səfər bıko.
Belorusədə bıə İroni səfir əlovəş karde: İron İslom Respublika rabitəon de hamsuyəon iyən dust və hamcəhətə kişvəron əcumlə Belorus Respublika, İroni 13 minnə dıvləti xarıci siyasəti iminnə koonku bə hisob omeydə.
İroni diplomatiya ijən əlovəş karde: İron İslom Respublika Prezident bovəş heste ki votımon iyən muzakirə bə milli hakımiyəti həxi və kişvəron bərobərə həxon ehtırom noey çərçivədəy və co qılə kişvəron daxıli koonədə mıdoxilə iyən bə çəvon ələyh sanksiya əncom doey məhkum kardedə.
Belorusədə bıə İroni səfir ijən əlovəş karde: de ım vucud ki de sultə tələbə kişvəron vositə, bə İroni ələyh mislış nıbıə sanksiyaon əncom bey holədəy əmmo İron elmi, sənaye və tojə texnoloqiyaon muxtəlifə baxşonədə, kişvəri həmmə tərəfiyə inkişofin cəhəto barzə qəmon peqətəşe, və ısət muxtəlifə baxşonədə məntəğə iminnə vırə iyən dınyoədə vey çokə vırəon kəsbış kardə.
Dəvardə soronədə İron və Belorus vey çokə rabitəon soyb bin ki çəy nəticə barzə səthi təmizə icloson iyən muxtəlifə təvafuğonədə nışo doə bıə.
