İroni atom enerji təşkiloti muavin: atom sənaye, kişvəri inkişofi bə nav bardə mıhərrik bə hisob omeydə
İroni atom enerji təşkiloti muavin de bə sənaye təchizaton bə bumi texnoloqiyaon təkidış kardə və votışe: aatom sənaye, kişvəri inkişofi bə nav bardə mıhərrik bə hisob omeydə.
İroni atomi enerji təşkiloti muavin, Seyd Pejman Şirmərdi de Mehr aqentiyəti votımonədə dəvardə 20 sori mıddətədə İroni atomi sənayeədə bə veyə təhəvulaton və əvəzon işorəş kardey bəpeşt votışe: muxtəlifə baxşonədə kişvəri atomi sənaye inkişofon vey oşkoe.
İroni atomi enerji təşkiloti muavin ijən təsdiğış kardə: İroni atomi sənaye royədə sultə nizomi deşmənion karde zınəş nıbe ım sənaye bənav şey vəy bıqəto.
Şirmərdi ijən bə İroni atomi sənaye zumandəti işorə və əlovəş kardə: hərbi, siyasi, iğtisodi, damon və xorək baxşədə atomi sənaye əmniyət icodəkəy.
İroni atomi enerji təşkiloti muavin ijən ım sənayeədə bə təchizaton bumi texnoloqiyan təkidış kardə və təchizaton soxtey və təmin kardeyədə və ditəsərrufat məhsulon ofoti məhv kardeyro şuae sistemon soxteyku xəbəş do və votışe: kişvəri atom sənayeədə ım sistemon icod kardey, kaştemoni zumandəti bois bəbe.
İroni cıvonə mıtəxəssison və alimon, atomi baxşədə de Amerkə sanksiyaon və sıpiyə kə ğərbi mıttəhidon vucudi, bə çəşəçi muvəffəğiyəton rəsə.
