Pars Today

İslomi İnğilobi Yolə Rəhbər Kərimə Ğıroni təlimonku, zalımə kişvəron iyən ğudrəton təhdid hiss kardey, bə ım İlohi kitob be ehtıroməti kardeyro çəvon planon illət zınəşe və de Amerkə iyən zuəvotə kişvəron mıdoxiləon mubarizə bardeyro, vey muhimmə məsələonədə bə yeqanə prinsip və islami kişvəron ittifoğ təkidış kardə.

Imruj seşəmbə, İslomi İnğilobi Yolə Rəhbər Həzrəte Ayətullah Xamenei nizomi rəsmi şəxson, İslomi kişvəron səfiron, Vəhdət konfransi mehmonon iyən kali milləti muxtəlifə qrupon vindemonədə Peyğəmbər Əkrəm(s) iyən Həzrəte İmom Cəfəre Sadığ(ə)-i miladi sorəqardış iyən ım nurani və yolə idi təbrik votey bəpeşt, bəşəri fik iyən dərəse, ə bozorqvari barzə şəxsiyəti dərəseyku iyən bəşəri zıvon, ə Həzrəti fəziləton bəyon kardeyku bezu zınəşe və hamiyəşe: yolə Peyğəmbəri dəvəşə həşi bə həmmə bəşəriyəti qi həxış heste və həmmə çəy ğarzıxoin boçi ki Peyğəmbər bənə mohir iyən mıtğəxəssisə həkim, həmmə vey muhimmə dardon bənə fəğr, cəhl, zılm, be ədoləti, şəhvət, be imoni, be hədəfi, ictimai zərəron iyən əxloği fəsodonro mərəfət iyən əməli nosxə bə bəşəriyət doəşe.

İslomi İnğilobi Yolə Rəhbər de cəholəti vositə bə Kərimə Ğıroni be ehtıroməti iyən zəif kardey vəhmi qıləy botilə xəyol zınəşe və Ğıroni deşmonon zoteni oşko kardey bois zınəşe və əlovəş kardə: Ğıron, hikmət, mərefət, inson soxtey iyən oğoəti kitobe və həğiğətədə de Ğıroni deşməni kardey de ım barzə mənoon deşməni kardeye.

Ə Həzrət ıştə sıxənon co qılə baxşədə bə vəhdət haftə işorə kardey bəpeşt, İslomi kişvəron siyosi rəsmi şəxson və yolon iyən İslom dınyo ellitaonku dəvətış kardə ki bə ım soval fik bıkon "islomi kişvəron ittifoği deşmon kom kəse və mısılmonon ittifoği bə kom kəson zərər jeydə və çəvon mıdoxiləon və cinoyəton mane icodəkəye?"

İslomi İnğilobi Yolə Rəhbər ijən tıkidış kardə ki Asiya ğərb iyən Afrika şimol məntəğədə islomi kişvəron ittifoğ Amerkə mıdoxiləon iyən zılm və dızdiro mane bəbe, ə Həzrət ijən hamiyəşe: ımruj Amerkə bə məntəğə kişvəron iğtisodi iyən siyosi zərbə jeydə, Suriyə nati dızdiyə, ıştə kəmpoədə DAEŞ-i zalım və vəhşiyə qrupi oqətəşe ta tojədən ehtiyocinə rujədə bə meydon varid bıkon və kişvəron koonədə mıdoxilə bıkon əmmo ehanə həmmə ittifoğışon bıbu və İron, Suriyə, Livan, Ərəbiston, Misr, İordaniya və Farsi dıyo ətrofədə kişvəron əsosi iyən vey muhimmə məsələonədə yeqanə prinsipışon bıbu, zalımə ğudrəton karde zınəşon ni iyən bəştə icozə nıdon ki çəvon xarıci siyosət iyən daxıli koonədə mıdoxilə bıkon.

Həzrəte Ayətullah Xamenei ijən islom dınyo həmmə şəxsiyəton və yolon bə ittifoği vey muhimmə məsələ nığıləti kardey zəruri zınəşe və məntəğə co qılə məsələon barədə yəni sionist rejimi dəvominə cinoyəton barədə hamiyəşe: ımruj ım rejim nə fəğət İron İslom Respublikaku bəlkəm ıştə həmmə ətrofinə kişvəronku bənə Misr, Suriyə iyən İrağiku xışmqine.

İslomi İnğilobi Yolə Rəhbər, dəvardə 10 sori mıddətədə, Fələstin iyən Fələstini milləti çəvon kə xarıc kardey iyən əvoni əşkəncə iyən ğətliam kardey, İslom dınyoədə iminnə məsələ zınəşe iyən təkidış kardə: İron İslom Respublika ğoymə nəzə ıme ki ə kişvəron iyən devlətoni ki de sionist rejim rabiton normal soxtey ğomari ıştə ko ulquədə ğərorışon do, zərəl bəkarden boçi ki ım rejim məhv bey holədəy və əvon məğlub bıə asbi sə şərt kardey holədən.