Zərif bə Mosuli ozod bey xoto təbrik peyğomi vığandışe.

İroni xarıci vəzir Daeş terroristiyə qurupi dastiku İraği Şimalədə bıə Neynəva ostani mərkəz Mosuli kamil ozod bey xoto bə İraği dıvlət və millət təbrik mesaji vığandışe.

Muhəmməd Cəvad Zərif zinə şəv ıştə Tuvitter səhifədə ijən təsdiğış kardə: har zəmon ki İraği millət de vəhdət hərəkət bıku bə hədəfon rəsero hiç məhdudiyəti ni və muvəffəğiyət yəğin təşkil bəbe.

Çımiku bə nav həm İroni milləti əmniyyət aliyə şura katib Əli Şəmxani və İroni mudafiə vəzir Qeneral Mayor Husseyn Dehğan həm ıştə peyğomonədə Mosuli kamilən ozod bəy bə İraği millət və dıvlət təbrik votışone.

İroni hərbiyə ğıvvon mıştərəkə ğərorqo fərmondə Qeneral Mayor Həsən Bağeri həm co qılə mesajədə İraği Neynəva ostani mərkəz Mosul şəhri ozodəti bə İraği rəsmi şəxson və İraği millət təbrik votışe.

İraği i minə vəzir Heydər Əlibadi zinə bə Mosul varid bıə ijən rəsmi surətədə ım şəhri çı Daeş terrroristiyə qrupi dastiku ozod bey elanış kardə.

Daeş terroristiyə qrup 2014 minə soriku de Amerkə və məntəğə bəzi Ərəbi və ğeyri ərəbiyə kişvəri bənə Ərəbiston və Tırkiyə koməki həmçınin de ğərbiyə kişvəron himoyəon bə İrağ hucum kardə və çandə cinoyəton mırtəkib bıə.

Həmonə zəmoniku detosə bə ısət İraği hərbion de Həşd Əlşəebi iyən İroni mıstəşariyə koməkon ım kişvəri vey məntəğəon əcumlə Mosul şəhri çı Daeşi dastiku ozodışon kardə və əmələn İrağədə ım terroristiyə qrupi umr bə oxo rəse.