Dıminə Ğərəboği Canqi Loyihə Məğsədon və Nəticəon-2
Dıminə Ğərəboği Canqi Loyihə Məğsədon və Nəticəon-2
Əzizə duston səlom, şımə cımə ruj bə xəyr bıbu, umidımone şımə hol-əhvol çok bıbu. bənə dəvardə haftə qıləy bərnomə bə şımə xıdmət təğdim bəkamon ki Ğərəboği 2 minnə canqi plani nəticə və ım canqiku Azərbaycan Respublika, Tırkiyə, sionist rejim iyən Rusiyə hədəfon barədəy. Im mətləbon çand qılə bərnomə ğolibədə bə şımə xıdmət təğdim bəbe. Dəvət kardəm bə dəvardə haftə bərnomə idomə quş bıdənən.
Mehribonə əməson, dəvardə haftədə işorə kardımone ki 44 rujə canqiku Azərbaycan Respublika əlovə bə Ğərəboği kontrol kardey hədəf, co qılə məxfiyə hədəfonış be. ım məxfiyə hədəfon: Enerji ovoştoniyero əmniyyəti əlovə kardey, Bə Rusiyə zid reqional balans icod kardey, bə Ğərəboği mıhosirə orəx doe, ozod bıə məntəğəon cəmiyəti əvəz kardeyku iborət be. Im məcmuə bərnomə idomədə, həminə 4 qılə hədəfon barədə sıhbət bəkamon.
Ğərəboği 2 minnə canqi planiku, Azərbaycan Respublika iminnə hədəf, enerji əmniyyəti əlovə kardey iyən bə inkişof rosniye be.
Azərbaycan Respublika 2 minnə məxfiyə hədəf, məntəğədə balans icod kardeye.Azərbaycan Respublika, muvəffəğ be, Tırkiyə iyən sionist rejimi hədəfon kənoədə, qıləy partiya icod bıkə ki Erməniston-Rusiyə partiya mığobilədə, səbarz bıbu, əmmo ım səbarzəti bə Ğərəboğ iyən Laçin karidorədə Rusiyə sulh mərominə hərbion sakin bey xoto, bə vırə nırəsə.
Əmmo Ğərəboğ 2 minnə canqi planədə, Azərbaycan Respublika 3 minnə hədəf, bəştə sərzəmini təcrid iyən izolasiyə ğələbə kardey be.
Azərbaycan Respublika, de Erməniston çand qılə məsələ barədə mınoğişəş heste. Məsələn Ermənistoni Siyonik ostani səmtiku Nəxcəvan mıstəğilə Republika, çı Azərbaycan Respublika əsliyə sərzəminiku co bıə. ğanuni surəti, Siyonik ostan Ermənistoni sərzəmine, əmmo Buko de pisixi təhdid iyən vəhşiyə hərəkəton vositə, səyo cəhd kardə ki bə Nəxcəvan sərzəmini oqəteyro, çəyədə qıləy karidori icod bıkə, qıləy holədə ki Miladi 2020 minnə sori, Noyabrə manqi 9 minnə ruji otəşbasti təvafuğnomədə jıqonə karidori soxte proqonoz bə ni. Boku dıvlət 44 rujə canqi mıddətəd, “Zənqəzur pesoxtə bıə karidori” icod kardeyro, cəhdəş be ki Erməniston sərzəmin iyən Meğri məntəğədə qıləy təcavuzkoronə əməliyot əncom bıdə ki Rusiyə təhdidon ım koy mane bıə, boçiki muxtəlifə fakton nışo doydən ki həminə prossesədə Azərbaycan Respublika Tırkiyə dast bənə boziçəy və çəy hədəf Turani sərzəmini icod kardeye ta ım royku Tırkiyə və Nato təşkilati bə mərkəzi Asiya rabt bıdə. Çəvon əsli məğsəd ime ki nəhayətədə bə Rusiyə, Çin və İroni ələyh, təhdidon icod kon.
Bandiyə Ğərəboği jeopoloteqiya cəhəto mıhosirə, Boku rəsmi şəxson diğğəti nəzə dəqətə bıə. Bandiyə Ğərəboğ komil forma, Azərbaycan Respublika ərazi daxılədə ğəror qətəşe. Və sərzəmini cəhəto, de hiç qılə kişvər hətto de Erməniston həm rabitəş ni. Ğərəboği iminnə canqi cərəyonədə, çəy hamsuyə sərzəminon işğal bıə ki bois bıə de Erməniston iyən İron mıştərikə marzış bıbu. Çən Azərbaycan Respublika səyo cəhd kardə ki ıştə ğanuniyə sərzəminon bıqəto ki həminə məsələ Ğərəboği izolasiya və zəifəti bois bıə, əmmo Laçin karidorədə, Rusiyə sull mərominə ğıvvon sakin bey iyən ım karidori royku, Ğərəboğ de Erməniston rabitə bərğəror kardey, Boku hədəfon bə vırə rosniyədə, mane bıə.
Əlovə bə Ğərəboği məsələ həl nıbıə məsələ, Azərbaycan Respublika iyən Ermənistoni miyono marziyə sərzəminon və xətton təyin kardey şivə, ım 2 qılə kişvəri co niqəronion be. Ozod bıə məntəğəonədə, marzi xətton təyin kardey şivə, vey bıhron icodəkəy, boçiki Azərbaycan Respublika iyən Ermənistoni zəminədə mıhosirə bıə sərzəminon vindey bıdə ki bə hamsuyə kişvəron məxsuse. Azərbaycan Respublika, Ermənistoni sərzəminədə 3 qılə mıhosirə bıə sərzəminon heste iyən çəy mığubilədə Erməniston həm 1 qılə mıhosirə bıə sərzəminon soybe.
Əmmo mehribonon, Ğərəboği 2 minnə planiku, Azərbaycan Respublika 4 minnə hədəf, ozod bıə məntəğəon cəmiyəti sturuktori əvəz kardey be. Dəvardə 30 sori mıddətədə, Azərbaycan Respublika iddioş be ki çəy vey muhimmə niqəronionku qıləyni, daxıliyə avarəon muşkilatonin, ki Ğərəboği 1minnə canqi məğlubiyəti nəticədə icod bıə.
Ğərəboği 1 minnə canqi cərəyonədə, çı Azərbaycan Respublika 20 faiz ərazi işğal bey bəpeşt, iyən həminə canqi cərəyonədə təğribən 1 milyon nəfər avarə bey, bois bıə Azərbaycan Respublika bənə vey daxıliyə avarəon soyb bey kişvəri, ziney bıbu. Qıləy holədə ki təğribən 1 soriku vey bəbe Ğərəboği 2 minnə canq sə bəy, əmmo oşko bıə ki Boku dıvlət bə ozod bıə məntəğəon avarəon oqordoneyro hiç hədəf iyən niyyətış ni, bəlkəm cəhd kardedə ki Tırkiyə dıvləti usmani emperia meylon cəhətədə, və de ım məntəğəonədə Təkfiri ailəon sakin bey vositə, çı məntəğə məzhəbi sturukori ki torixi mıddətədə şiə be,, əvəz kardey dumoədəy.
Nəhayətədə bəpe bıvotəmon ki Ğərəboği 2 minnə canqədə oşko iyən məxfiyə hədəfon nışo doydə ki ım canq qıləy plan be ki çəy hədəfon Azərbaycan Respublika işğali ərazi ozodi iddioku bəpeye. Həminə cəhətədə, İtaliya şimoli Bolzanoədə bıə, bə inkişof rəsə mıtoliəon mərkəzi rəis, Ronald Benedikter voteydə: Miladi 2020 minnə sorədə, Ğərəboği canq qıləy niyobəti canq be. Har 2 qılə tərəfi nioyobəti iyən canişinəti canq yəni həm Rusiyə və həm Tırkiyə, muvəffəğ bıən ım daveku mənafe kəsb kon.
Həğiğətədə har 2 qılə ğudrət, Ğəfğazədə ıştə iştiroki zumand kardey cəhətədə, Miladi 2020 minnə sorədə, Ğərəboği canqi daveku bənə əbzor istifodə kardeşone və de yande koməki muvəffəğ bıən Ğəfğazədə ıştə iştiroki zumand kon, ki diyalektiki surəti, ıştə sərzəmini zumandəti de 19 minnəəsri metod iyən şivə, hevuj kon.
Mehribonon bə ım bərnomə quş doe xoto şıməku təşəkkur kardedəm. İnşaəllah vəoməy haftə həminə bərnomə idomə bə şımə xıdmət təğdim bəbe. Dəvət kardəm bə co bərnoməon quş bıdənən ki koy həmron bə şımə xıdmət təğdim kardən.
