Edoardo Aniyelli bəfoti ruj

Edoardo Aniyelli bəfoti ruj

Avropədə islomi ozavziye qıləy mevzuye ki,ımruj ğərbi ziyodə analitikon dığğətış bəştə tərəf cəlb kardedə və eyni holədə bəçəvon çoçinəti iyən heyrəti dıço bıə.haftənomə bıə “Şpiqel” avropədə çı İslomi təhlili həxədə jıqo nıvışteydə:”İslom dınyo dinon miyono həmməysə vey bəyji iyən həmməysə vey dinamikə dine.hiç qıləy dini camiyə inkişof bə islomi ruşd və ozavziye rəseydəni”.

Imruj ğərbi mışohidəçiyon deştə sə qin kardey çı islomə dini ozavziye şoydin.məsələn,İspaniyədə Ənədəlus devləti suğutiku 500 sor dəvardey bəpeştə,İspaniyəvıjə cıvonon ziyodə formadə bə İslomi səmt dimışon qətə. İslom həm Avropədə və həmən Amerkədə ziyodə insononış bəştə səmt cəzbış kardə ki, tojə dınyo odəmi bə təəccıbi vodor kardə şat-şutə roonədə qim bıən və qıləy hidoyəti nuri dumon ki, əvoni çı noumu,qim bıey iyən behədəfətiku xiliosko peroxno.harçənd ğərbi məmləkətonədə çı mısılmınon mığdori ziyod bıey bəçəvon bə həmonə kişvəron səmt kuç kardey iyən bə miqrasiyə məsələon dəlili xotoye,əmmo eyni holədə  İslomi bə əslə avropəvıjon dılə təşərruf pəydu kardey  həm vey bıə holədəy ki,çəvon veyni həm camiyə elitaon iyən səvodinə təbəğəku bə hisob  omeydə və çəvon miyono ziyodə şəxson həm çı ğərbi hınə soybon,ənıvışton iyən filosofonku təşkil doydə.

 Edoardo Aniyelli(Agnelli) qıləy italyavıjə senator iyən milyarder, Fiat, Ferrari, Obko, Lamborgini, Lançiya iyən  Alfarmo avtomobil fabrikə soyb,çandə qılə sənaye zəvodon,xısusi bankon,moda iyən oləti dizayni şirkəton,La stampa,Kurire,de lasra və Yuventus fitbol klubi soybi fərzənd 1954-ə miladi sori iyunə manqi 6-ədə bə dınyo ome.əv ıştə ibtidayi təhsilış İtalyədə və peşo çı İngilsotoni Atlanta kollecədə dəvomış doe. peşo Amerkə Prinston universtetədə “dinon iyən şərğ fəlsəfə “fakultədə dokturanturaş oroxne.Edovardi əjdod İtalyədə de Fiat maşini zəvodi oj kardey ın dıjdə sənayeş təsis kardəşbe ki,ımruj çəy nezə odəmon çı Fiat şirkəti yolə səhmdor,çandə bank iyən bimə şirkəton ,Yuventus futbol klubi və sayirə soybin. Edovardo pı  bə məsihiyon katolik sekta və məzhəbi mənsub be və çəy mo həm qıləy yəhudiyə prinsessa və xanım be.

Edovardo  Nyu-Yorkədə məşhurə Prinston universtetədə “dinon iyən şərğ fəlsəfə “fakultədə dokturanturaş oroxnəbe.əv İncil İyən Tovrati handedəbe.əmmo,ımon əy ğane kardedə nıbe.əv 20 sinnədə be ki,təsodufən  çəşış kitobxonədə bə qıləy Ğıroni kitobi peqıniye və binoş karde çəy ayəonku çandə qılə hande.əv Ğıroni ayəonku hande-hande ijən dılış hestebe çəyku vey bəhando və hiss kardedəbe ki,ım kitib çı bəşəri kitob ni.

Edovardo ıştə mıslmon bıye həxədə jıqo votedə:”Hyu-Yorki universtetədə dərs handə zəmonədə,iruj kitobxonədə ğədəm jedəbim və bə kitobon diyə kardedəbim.bə ikkərə çımı  çəş bə Ğıroni peqıniye və dılım hestebe diyəkəm hələ bunim Ğırondə çiç heste.əvım peəqte bə dast və binom karde bo ın kitobi ingilisi zıvonədə hande.hissım karde ki,ın kəlməon nuraniyə kəlməonin və ım bəşəri nıvıştə kitob ni.əve çəy ayəon bəmı vey təsiriş karde və əvım bə əmonət peqətıme ta vey mutoliyəkom və hissım karde ki,əy sərəsedəm iyən ğəbul kardedəm”.

Əv islomi barədə dəğiğə şikilədə tədğiğ iyən mutoliyə kardey bəpeştə,Nyu-Yorkədə bə qıləy islomi mərkəz şeydə və əyo votedə ki,mı dılım heste mısılmon bıbum.əv əyo şəhodəteyn votedə və ıştə nomi Hişam Əziz noydə.Edovardo islomi barədə ziyodə mutoliyə bədiqə bəçəy şiə məzhəbi səmt dim qətedə və ıştə tojə nomi de Məhdi nomi əvəz kardedə. əv votedə:”bəşəvnəy qıləy toykiyə otoğədə de şami ruşnə de Kərimə-Ğıroni tilovəti məşğul bedəbim və çımı ruf deçəy hande vositə jıqo tojə bedəbe ki,çımı bə zəmondə bıə hol-həvo və əhvol-ruhiyyəm  de co hiç qıləy holi mığoyisə kardənin ni”.

Bo Edovardo bə dini islomi tərəf meyl nışon doe iyən mol-devlət iyən sərvəti beəhəmiyyət zıney,boyis bedə ki,çəy pı əy çəy mol-devlətonku irs bardeyku məhrumko.əve çəy amuyə zo Ciyani Aniyelli ki,qıləy məsihi iyən xristiyan be çı Edovardo əvəzi canişin təyin be və qırd miroson bəy rəse.əmmo tikəy nıdəvarde ki,çəy amuyə zo bə qıləy zıney nıbə xərçənqi noxəşəti xoto çı dınyoku şedə.

Edovardo de şiə iyən İron İslom İnğılobi sıftənə oşnoəti de İroni(1358-61 həşi sori) İtalyədə səfərotxonədə mətbuat mışovir  bıə doktor Məhəmmədhəsən Ğədiri Əbyanə mısohibə vositə be ki,çı İtalyə televizyaku pevolo be və Edovardo ın mısohibə məsey bəpeştə  deəy vindemon kardero bə İroni Romaədə bıə səfərotxonə ovard kardedə və həmonə ko həm boyis bedə ki,Edovardo Aniyelli de İroni qıləy rabitəş bıbu.Anieylli çı İmom Xomeyni(r) aşığ be və əve votedəbən ki,az Kərimə-Ğıronədə zikr bıə salehə insoni sima İmom Xomeyniyədə vindedəm.