Ummul-muminin Xədiceyi-Kubra matəmədə
Ummul-muminin Xədiceyi-Kubra matəmədə
Besəti daminə sori mıborəkə Rəməzonə manqi bo Xıdo-Rəsul(s)-I qıləy ğəmqinə ruj be.bın ruji islomi buzurquvarə peyğombər(s) qıləy jimoni həmroş çı dasto doe ki,çəy vey çokə həmdəm və munis be. qıləy jimoni həmro ki,de tosə ıştə jimoni oxonə ləzə ıştə qırd be-nıbeyış bo islomi dəvəti ixtiyorədə ğərolış doəbe.
Beşək,həzrəte Xədicə(s) zikr nıbə holədə islomi torıxi sıftənə rujon təhğığ kardey qıləy noğisə koye. Əv, qıləy şəxsiyətin iyən pokdovnə jen be və çəy xıyzoni şərofət,əvış çı Ğureyşi məşhurə jenon cərqədə ğərolış doəbe.Xıdovənde-Aləmi irodəş karde ki,Xədicə(s) həmməysə barzə məğamədə ğərol bıdo,əve ə həzrətış de həzrəte Muhəmməd(s)-I oşnoş karde.
Məşhurə torıxəvonon çı Ğureyşi yolə banu yəni həzrəte Xədicə(s) nomışon de qıləy nəcib,pokdovnə iyən bə tarifi loyığ jeni nomi zikr kardəşone və çəy sədoğət,dırstkoəti və çəy insoni iyən elmi kəmolaton ğeyd kardəşone. həzrəte Xədicə(s) ali əxloği keyfiyyətonku əlovə maliyyə nəzəku həm qıləy çokə şərayitış hestebe və çokə sərvət iyən mol-devləti soyb be.joqo ki,ıştə ticori kərvonon bə mıxtəlifə məntəğəon vığandedəbe.
Harçənd həzrəte Muhəməd(s)-İ ZİYODƏ mol-devlətış nıbe,əmmo çə həzrəti Əmin ləğəb ki,əvış çı sədoğət iyən insoni fəzilətion sayədə bə dastış vardəbe, qıləy dıjdə sərmoyə bə hisob omeydəbe.bəçəy xoto,de peyğombər(s)-I amu Əbu-Talıb(ə)-I təklifi və de Xədicə(s) roziyəti Muhəmməd(s) çəy ticori kərvoni yolyəti vəzifəş ğəbul karde.ə həzrət ıştə bə Şam bıə ticori səfədə de Xıdovəndi inoyət iyən lutfi ıştəku qıləy vey aliyə məhorət və idorəçətiş nışon doe və ım ticori kərvoni ziyodə bəromə və mənfəətış bə dast varde.ın amilon boyis be ki,Xədicə(s) de həzrəte Muhəmməd(s) şəxsiyyəti çok-çoki oşno bıbu və ın ko de ın dıqlə buzurquvar və yolə şəxsiyəti de iyande izdivac iyən vəyə kardey boyis be.
Peyğombər(s)-I amu Əbu Talıb əğd iyən kəbini bıryə zəmonədə ıştə boə zoş jıqo təğdım karde:”çımı bıvə zo Muhəmməd(s) de Ğureyşi har qıləy fərdi mığoyisə kardey bıbu,Əv,hakəsisə vey kəmolati nəzəku bəpeye və ehanə çəy dast dınyo sərvət və moliku təylibu,əmmo sərvət miyoniku şıə qıləy soğnəy.əmmo,çəy əsl və nəsəb sabit və mandənine”.
Həzrəte Xədicə(s) ıştən həm bə ın nuktəş bovəş hestebe.həyğətədə,bə həzrəte Xədicə(s) fəzilət baxş kardə çi,çəy nığılə bəsirət iyən ruşinə fik be və ə həzrət deştə qırd vucudi ğəbulış karde ki, həzrəte Muhəmməd(s) həmonə həşiye ki,bəçəy dıli mərkəzi nur və ruşnə baxş kardedə və deştə çokə xısləton bə insoniyyəti məno doydə.
Həzrəte Xədicə(s) çı peyğombər(s) mənəvi əzəməti mığobilədə bıə təvazukorəti,boyis be ki,çı Ğureyşi kali jenon əy mızəmmətkon.boəvon rostəvojəti,əmonotdoəti və xoş əxloğəti qıləy dərk kardey nıbə çi be.əvon çı qıləy sərvəti soyb bıə jeni de qıləy moliyyə cəhəto dastış təy bıə merdi izdivac kardey dərk kardey zıneydənıbin.bəçəy xoto,əvon bə Xədicə(s) tanə jeydəbin,əy əziyyət kardedəbin və de ə həzrəti noloyığə rəftoron kardedəbin.Xədicə(s) bə qırd ım noşukrəti iyən nodonəti bıə cəvob,fəğət mığovimət nışon doey iyən ıştə jimoni həmro kəno orom qətey be.əv bə tanə jıə iyən əy mızəmmət kardə jenon jıqo cəvob doydəbe:”aya şımə bənə Muhəmmədi(s) çokəti,çokə rəftor,bə xoş omə xısləton,fəzilət iyən şərofətədə qırd ərəbi sərzəminədə co qıləy şəxs zıneydon?”.
