Najeriya : Fashewar Bututun Mai, Ta Yi Ajalin Mutum Fiye Da 50
Mar 03, 2019 04:07 UTC
Fiye da mutane 50 Sun rasa rayukansu sanadiyyar fashewar bututun man fetur a Najeriya.
Kamfanin dillancin labarun Anatoli ya nakalto cewa; Bututun man fetur din ya fashe ne a Jahar Bayelsa da ke kudancin kasar a jiya Asabar.
Kawo ya zuwa yanzu babu wani cikakken bayani akan dalilin fashewar bututun, sai dai wasu jami’an gwamnati a yankin sun zargi matasa da fasa bututun saboda dibar albarkatun mai.
A baya an sha samun irin wannan asarar rayukan saboda fashewar bututun wanda kan faru ta hanyar fasa shi da ake yi.
A watan Oktoba na shekarar 2018, mutane 24 ne su ka kwanta dama saboda fasa bututun da aka yi.
A birnin Ikko ma mutane 150 sun taba mutuwa saboda fashewar bututun a ranar 12 ga watan Mayu na shekarar 2006.