Jami'an Tsaron Isra'ila Sun kame Falastinawa

Sojojin Isra’ila sun kame Palasdinawa da dama a yankin yammacin Kogin Jordan.

Kamfanin dillancin labarun “Mehr’ na Iran ya nakalto majiyar Palasdinawa na cewa; A jiya Asabar, sojojin Sahayoniya sun kai hare-hare a yankuna daban-daban na yammacin kogin Jordan, tare da kame Palasdinawa masu yawa.

Majiyar Palasdinawa ta kara da cewa a wasu yankunan da ‘yan sahayoniyar suka kai hari, an yi taho-mu-gama da samarin Palasdinawa.

A cikin watannin bayan nan ana samun taho mu gama a tsakanin sojojin Sahayoniya da kuma samarin Palasdinawa da suke kokarin hana gina matsugunan yahudawa ‘yan share wuri zauna a yammacin kogin Jordan.

Akwai dubban Palasdinawa a cikin gidajen Kurkukun ‘yan sayahoniya wadanda aka kama ba bisa wani kwakkwaran dalili ba.