Իրանի նախագահական ընտրություններն տեղի կունենան հունիսի 28-ին
Թեհրանի քաղաքապետ Ալիռեզա Զաքանին հանել է իր թեկնածությունը Իրանի նախագահական ընտրություններից՝ հօգուտ երկու այլ թեկնածուների՝ խորհրդարանի նախագահ Մոհամմադ Բաղեր Ղալիբաֆի և հանրապետության Անվտանգության խորհրդում հոգևոր առաջնորդի ներկայացուցիչ Սաիդ Ջալիլիի։
«Հասել եմ նախընտրական մրցավազքի [օրենքով սահմանված] շրջանի ամենավերջին, սակայն մահացած [նախագահ Էբրահիմ] Ռաիսիի ընթացքը շարունակելն ավելի կարեւոր է։
Խնդրում եմ Ջալիլիին և Ղալիբաֆին միավորվել, անպատասխան չթողնել հեղափոխության ուժերի օրինական պահանջները և թույլ չտալ Ռոհանիի երրորդ կառավարության ձևավորումը», — գրել է Զաքանին X-ում:
Իրանի նախագահի թեկնածուների նախընտրական քարոզարշավն ավարտվել է․ երկրում այսօր լռության օր է։
Նախագահի պաշտոնի համար արդեն պայքարում է 4 քաղաքական գործիչ։ Նրանց թվում են խորհրդարանի խոսնակ Մոհամմադ Բաղեր Ղալիբաֆը, հանրապետության Անվտանգության խորհրդում հոգևոր առաջնորդի ներկայացուցիչ Սաիդ Ջալիլին, ներքին գործերի և արդարադատության նախարարությունների նախկին ղեկավար Մոսթաֆա Փուրմոհամադին և առողջապահության նախկին նախարար Մասուդ Պեզեշկիյանը ։
Փոխնախագահ Ամիր Հոսեյն Ղազիզադե Հաշեմին հունիսի 26-ին հայտարարել էր, որ հանում է իր թեկնածությունը՝ հօգուտ այլ թեկնածուների։
Նախընտրական քարոզարշավի ընթացքում անցկացված սոցհարցումների վերջին արդյունքների համաձայն՝ Մասուդ Պեզեշկիյանն այժմ առաջատար դիրքերում է։ Ջալիլին և Ղալիբաֆը համապատասխանաբար երկրորդ և երրորդ տեղերում են։
Իրանում արտահերթ նախագահական ընտրությունները, որոնք հայտարարվեցին երկրի նախագահ Էբրահիմ Ռաիսիի մահից հետո, տեղի կունենան հունիսի 28-ին։